ريم محمد..تكتب.الألم والمعني.
كلنا بيعدى علينا في حياتنا اللي بيحسسنا بالالم .. الالم قدر ربنا بيبعته لحكمه لكن بيختلف تفسيرنا لشدته ورد فعلنا في التعامل معه من شخص لاخر …
فينا اللي بيعامل مع الالم بمنطق التجاهل بيهرب من المه ويستخبي في افكار من غير مشاعر
غالبا النوع دا في طفولته بيكون عنده احتياج للاهتمام لم يشبع وبيفضل جواه رساله ان المه مالوش لازمه لان هو اصلاا انسان محدش شايفه . ودى رؤيته عن نفسه اللي بتزود الالم . والشخص دا بقي رد فعل جسده بيكون ترجمه للالم اللي بيهرب منه صداع ومشاكل صحيه ملهاش اي جذور عضويه لكن ترجمه لالم بيستخبي ورا الم …
النوع التاني.. دا اللي بيغرق في الام ويسيب نفسه للشكوى واسترجاع كل صور ومعاني الالم بيغرق وبس والناس دى تلاقيها دايما في عياده الامراض النفسيه لانها معندهاش قدره علي التجاوز لوحدها دايما مش بتعرف تشوف مسؤليتها عن الالم علشان كده عمرها مبتتخطاه…
في نوع بقي الالم عنده معني بيترجم لعمليه تعلم بيعرف يقرا رساله ربنا ورا المه بيقبل ويرضي وبيشوف فين مسؤليته عن الالم ويحولها لخبره في الوعي والنضوج يتعامل بيها في دنيته ودا الشخص المسؤل اللي بيعرف يحول الالم لمكسب وبيعرف ان الانسان محدود وان ربنا له حكمته ولازم نقبل قضاءه في اي حاجه بتحصل …
النوع الرابع بقي دا الانسان اللي اتالم فتعلم وقرر يعلم … النوع دا من الناس حول معني الالم لخبره واستفاده مش له وبس دا قرر يكون مؤثر في الكون ويعلم الدرس لكل اللي حواليه يساعدهم علي فهم المعني ورساله ربنا والتجاوز للالم بخبره وووعي هو مش بس كسب تمن الدرس اللي اتعلمه بالألم لا دا حوله لمصدر عطاء وخير ومساعده يعلم بيها ويسند اللي حواليه …
الالم بنقدر نتجاوزه لما بنفهم المعني وراه ونرضي ونقبل قضاء ربنا ونتعلم الدرس ونستفيد منه ….
ياتري انت مين في الاربع انواع .. فكر واعرف انت فين من ألمك؟؟
