الحساسية الصدرية فى الأطفال

سؤال شائع ..

بنتى الكحه ماسكاها مبتنيمهاش و خاصة بالليل و في الشتا

ومش لاقيه حل

بوديها للدكاتره و يدوها مضاد حيوى و دوا للكحه و لبوس و ترتاح يومين و ترجع تتعب تانى بعد أسبوع !!

لا بيقولولى نزلة شعبية وساعات نزلة برد

مبدئيا كده تشخيص الحساسية ببساطة جدا لو الطفل عنده:

1 _ كحة تزيد مع المجهود او بالليل او مع الصحيان من النوم

2_ معاها كرشة نفس ونهجان

3_ صوت خرفشة او تزييق بالصدر

لو اتنين من التلاته اللى فوق دول مع وجود شرط اساسى وهو التكرار يبقى بنتك عندها حساسية صدرية و ياسلام بقى لو فيه تاريخ مرضى في الاسرة للحساسية سواء انفية او صدرية او جلدية يبقى الموضوع منتهى

ليه التشخيص حساسية وميكونش عندها التهاب في صدرها ولا حاجه تانيه و كمان معندناش حد في العيلة عنده حساسية ؟!!

أولا الأبحاث بتقول ان حوالى 20% من الأطفال اللى عندهم حساسية صدرية مبيكونش فيه تاريخ مرضى للحساسية في الاسرة ⁦⁦⁦⁦⁦اساسا !

ثانيا انتى بتقولى ان الطفلة بتتحسن وبعدين تتعب تانى يعنى لما بتاخد الجلسة او موسع الشعب بتخف فعلا و ده من اهم صفات الحساسية انها تتحسن مع جلسات الفاركوين وادوية موسعات الشعب ولو مبتتحسنش نفكر في تشخيص تانى ذي ارتجاع المرىء و تمدد القصبات الهوائية او حساسية انفية او انسداد في مجرى التنفس.

– العلاج له شقين

علاج وقائى : وده الطفل بياخده وهو سليم تمام علشان الازمة متتكررش و لو اتكررت تكون ضعيفه جدا وده أساس العلاج و اللى بيفوت من معظم الأطباء وكمان الأمهات بتخاف منه وبسبب عدم الانتظام عليه الطفل بيتكرر عليه الازمه باستمرار !

العلاج ده بيتكون من مادة المونتليوكاست ( السنجيولير و بدايله ) و دى بتتاخد على لبن او زبادى (مش ميه او عصير !) باستمرار و مش شرط توقف بعد فتره بخاخات الكورتيزون ( لونها برتقالى زى الفلكسوتايد ) وده بالرغم من ان الشائع انها تؤخد للأطفال اللى حالتهم صعبه إلا انها متصنفه أنها اقل درجات العلاج وأولها لان مفعولها كويس جدا ( افضل علاج ) و اثارها الجانبية تكاد تكون معدومه لانها تعطى بالاستنشاق و المادة الفعالة تصل للشعب الهوائية بتركيز كبير ولا تصل للجسم إلا بتركيز بسيط جدا يكاد يكون معدوم

تانى شق من العلاج وهو علاج الطوارئ وده بيتعطى أثناء التعب (الانتكاسه) و عبارة عن موسعات الشعب (جلسات الفاركولين و الاتروفنت ( أو بخاخة الفنتال و تتكرر طول مالطفل صدره بيزيق أو بيكح

المضاد الحيوى ملوش دور في علاج الحساسية نفسها لكن يفيد لو كان هناك عدوى بكتيرية بالجهاز التنفسى و هي اللى عملة انتكاسه للحساسية !

٦٠٪ من حالات الحساسية بتختفى عند ٦ سنوات ، والباقى بعد ١١ سنة و لكن الحساسية اللى بتبدأ تظهر عند ٦ سنوات فما فوق هيا اللي بتسيب آثار بعد البلوغ ، ولعلمك الابحاث تؤكد

ان العلاج بالكورتيزون بدرى بيقلل من حدوث مضاعفات عند الكبار في علاج الحساسية في الطفولة !

مقوله مكرره لدى الامهات

الحساسية مرض مزمن شبيه بالضغط والسكر كده و مفيش تعود على العلاج ولا حاجه هو طبيعة التعب اللى بتفرض استمرار العلاج ، يعنى احنا بنكتب العلاج يخلص تجيبي غيره ، والدكتور كل مرة هيسألك شوية أسئلة وعلى أساسها هيزود العلاج Step-up أو يقلله Step-down , لغاية ما ربنا يأذن بالشفا من عنده

طبعا الوقاية مهمة دا لحالات الحساسية و التزمى بالتعليمات دى

1_ ابدئى ببخاخة الكورتيزون و بكاوى السنجيولير من الأن

2_ ابعدى طفلك تماماً عن الدخان ، التراب، العطور ، البخور ، ومخدات الريش و السجاد فرو الحيوانات الأليفة -القطط بالذات – الهواء الساقع

3_تطعيم النفلونزا الموسمية كل سنة وده بيكون متوفر بالعيادات من شهر 9 (متوفر الان )

4_الاهتمام بالتغذية السليمة وتقوية المناعة ببكاوى برونكوفاكسوم لمدة 3 شهور كل سنة

5_ علاج حساسية الانف و اللحمية و اللوز و التهاب جيوب الانفية و الرشح بسرعة

6_ علاج نوبات الطوارئ بجلسات الفاركولين او بخاخة الفنتال بسرعة

7_ العلاج بالبخاخات و الجلسات علاج حساس مينفعش توقفيه من دماغك ولا دكتور مبيشتغلش بيه يوقفه و تعديل الجرعة يكون باستشارة الطبيب أولا لتجنب الانتكاسات

8_ أدوية البرد (ذى الكونجستال و فلومول و إخوانهم) ممنوعين للأطفال دى نهائى و كذلك الأسبرين

9_ اثناء النزلة الطفل يشرب ليمون دافى عليه عسل ابيض و ورق جوافه وشاى خفيف (ده بره البروتوكول بس عن تجربه شخصية )

ملحوظه : فى أحيان كتيره يفشل الطبيب فى إقناع الأم بالعلاج بالبخاخات بسبب تفشى عدم وعى أو خوف لدى الأمهات أو نشر مفاهيم و فزاعات خاطئة للأسف