فوزى محمد يكتب : نصائح لكل من يقدم على وظيفة HR

حاول قدر الامكان تفهم شغل الـ اتش ار العملي بعيدا عن الكورسات، اسأل أصحابك أو دور علي معلومات أو نزل أسئلة علي الجروبز، المهم تعرف الشغل العملي، وايه الـ بيحصل في مطبخ الاتش ار مش في الكتب

ـ الاتش ار مش طب نفسي، ومالوش علاقة بعلم النفس بشكل مباشر، ومش بيتعامل مع النفس البشرية انما بيتعامل مع طبيعة موظف، الاتش ار ادارة فيها انشطة محددة تحتاج ابداع عشان تطور الشركة وتلاقي حلول للمشاكل الـ ممكن تواجهك

ـ الاتش ار مش هما الـ بيعينوا الناس وبيرفدوا الناس، دي صورة مغلوطة، ده جزء بس من الاتش ار، فيه أنشطة تانية كتير جوة الاتش ار

ـ اتنازل شوية في المرتب بس ما تسمحش لحد يستغلك

ـ اقبل بمرتب قليل لو الوظيفة اتش ار فعلا، مش اتش ار كفتة، وهتتعلم بجد وهتتأسس في الاتش ار صح، اسأل الوظيفة ايه وهتشتغل في ايه، عشان ما يطلعش في الآخر شغل سكرتارية والاسم اتش ار

ـ ما تسيبش شغلك الا لما تلاقي شغل اتش ار، مش عشان المرتب انما عشان الـ بيشتغل فرصه بتبقي أعلي، معرفش ازاي، وفر أجازاتك عشان تعمل فيها انترفيو

ـ تاني ما تسيبش شغلك وتقعد في البيت عشان تدور علي شغل اتش ار، أحمد خالد توفيق كان بيقول الحل الوحيد للمشاكل النفسية هو: لا تكن عاطلاً… لا تكن وحيداً