د. خالد حامد يكتب علاج الضعف الجنسي لمرضى القلب والسكر
هاعمل معاك جميلة مش هتنسهالي طول عمرك علاج الضعف الجنسي لمرضى القلب والسكر
_ساعات يجيلي مريض ضعف شديد بعضلة القلب مثلا وبياخد نفسه بالعافية ويقولي مافيش قدرة علي الجماع، مش مهم النفس يادكتور، المهم العلاقة!
طيب هتيجي إزاي وانت مش قادر تتنفس؟
مجهود العلاقة الزوجية يعادل قدرتك علي صعود دور او اتنين سلم بشكل طبيعي ونفس مرتاح >>> عالج القلب أولا وبعدين هيجي الجماع.
_ أدوية الضغط بتعمل ضعف جنسي؟
(مقولة خاطئة تماما، فى مليون نوع لعلاج الضغط وكتير منهم لايؤثر علي الحالة الجنسية، وإن أثر البعض بالسلب ممكن توقف العلاج وتراجع الطبيب لاستبداله بنوع أخر، لان الوهم نفسه بان العلاج هيضعف فعلا بيضعف!)
إرتفاع الضغط وكذلك السكر والكولسترول من مضاعفاته ضعف القدرة الجنسية، يعني لازم تظبط ضغطك وسكرك علشان تظبط الأداء الوظيفي
_المنشطات الجنسية لا تغني عن المداعبة قبل الجماع (هلا تزوجت بكرا تلاعبها وتلاعبك)، المنشطات لزيادة الأنتصاب فقط، ويبقى عليك خلق الجو المناسب وتحسين الحالة المزجية للطرفين، خليك زوق ولطيف!
_خطير جدا الدمج بين المنشطات الجنسية ومادة النيتروجلسرين (النيتروماك،وانجيوفوكس) أو اي مواد أخرى زي الكحول او الحشيش لأنهم بيتفاعلوا مع بعض ويؤدي إلي هبوط شديد في الضغط لمرضى القلب فيزيد حدوث أزمة قلبية.
فلو هتاخد حاجة منشطة (بجرعة يحددها طبيب القلب) لازم توقف النيتروجلسرين قبلها بيومين وماتخدش معها أي حاجة تاني…
_في أكلات بتحسن تدفق الدم للاعضاء التناسلية ” مش من ضمنهم الحمام والبط” مفاجأة مش كدة
الحمام والبط غني بالدهون والكولسترول فبيزود لزوجة الدم ويقلل تدفقه لاعضاء الجسم بما فيهم القلب والأعضاء التناسلية.
” أذكر مريض فضل أول 3 أيام زواج لم يستطع ممارسة الحياة الزوجية رغم انه بياكل بط وحمام وجمبري كتيييييير وحالته النفسية أدمرت ولما الدكتور نبهه لتخفيف اللحوم والحلويات مارس حياته بشكل طبيعي!
ماهو الباشا ثقافته من الأفلام والمسلسلات وفرحان بدكر البط، فبياكل وينام ”
_ أتربينا إن الحلويات بتنشط وتدي طاقة ” الفرولة رش عليها سكر، الرمان رش عليه سكر، اي حاجة مفيدة غرقها سكر ” ، ودة غلط جدا لانها بتدي دهون وسمنة وارتفاع بضغط الدم والكولسترول والسكر، جسمك مش محتاج ولا معلقة سكر لو تقدر، كل الحاجة زي ماربنا خلقها وهي فيها سكر معتدل، ويكفي النشويات بكميات قليلة (رز، مكرونة، عيش، بطاطس) والجسم بيحولها بردو لسكريات تمده بالطاقة المناسبة، خف سكر خالص يا سكر
_الأكلات المفيدة الخضروات والفاكهة ” اي حاجة خضراء حبها جرجير بقي خس خيار سبانخ او حمراء تفاح برقوق توت عنب” ،وكذلك الأسماك والمكسرات بتحسن الأكسجين في الدم وسلاسة وسلامة جدران الأوعية الدموية، والسلاسة بتجيب سلاسة
_الأكلات اللي لازم تبعد عنها اللحوم المصنعة(زي اللنشون والبسطرمة والبرجر)، المقليات بطاطس مقلية، فراخ مقلية، مقلية مقلية.
“اي حاجة مقلية، كلها هي هي بس مسلوقة او مشوية” الله أكبر عليا، جمل تجيب صداع
_ بمناسبة الصداع 99.9٪ من الناس فاكرين ان الفياجرا بترفع الضغط علشان بتعمل صداع
هاقولك سر مايعرفوش غير دكاترة القلب، الفياجرا بتوطي الضغط مش بتعليه، وتستخدم للرجال و والسيدات في علاج” ارتفاع” ضغط الشريان الرئوي (لو مش مصدقني اكتب علي جوجل تأثير الفياجرا علي ضغط الدم، بس افتكر انك بتراجع ورايا ودة مش حلو وفيه أزمة ثقة) ،فلازم تشرب معاها ماية كتير علي مدار اليوم.
_ بس من الأخر يعني انا كمريض قلب أعمل إيه، واخد منشط جنسي ولا لأ ؟؟؟ أاااانجز وقولنا نعمل ايه كلت دماغنا
طريقتك في الكلام مش عجباني، بس هقولك علشان انت صاحبي وخايف على مصلحتك
عالج أي سبب عضوي أولا، يعني خد علاج الضغط والسكر والكولسترول وعلاج ضعف عضلة القلب ولو في تضخم بروستاتا عالجها او اي حاجة بتؤثر علي الجهاز التنفسي والرئة عالجها والسجاير بطلها، وتخلص من كرشك وأعمل نص ساعة رياضة يوميا وحسن الحالة المزاجيه وبطل نكد، ولو الحالة الاقتصادية صعبة مش هتعرف تعمل أى حاجة من الحاجات اللي فوق دي فماتشغلش بالك بالحاجات اللي تحت، أقولك أنسها ياحج أنسها واقعد علي القهوة اتفرج على المنتخب شوف النني وهو بيلف حولين نفسه، سلي وقتك بأي حاجة تانية غير الموضوع دة الكار دة مش كارك
الأهتمام مابيطلبش ياحج، لكن الصحة والعلاج لازم يطلب وتسعى له، ربنا يوفقك
