د. خالد حامد يكتب .. بعض النصائح عن كيفية مقاومة ضغوط الحياة
حبيت أعيش الدور وأكتب لكم شوية نصائح عن كيفية مقاومة ضغوط الحياة، بس الحقيقة مالقتش حاجة تساعدك أحسن من الفضفضه ومافيش حد هيسمعك أحسن منك !!!
بحس إني أكتر واحد ممكن يقعد يكلم نفسه!، رغم ان لما كان اهل زوجتي بيسئلوا عني ايام الخطوبة كان بيتقال لهم (خالد أهم ما يميزه انه متزن نفسيا ) ،طبعا زوجتي قالتلي الكلام دة بعد الزواج…
فقعدت بردو اكلم نفسي؟!، ليه زمايلي بيقولوا عليا متزن نفسيا؟! ويعني إيه أصلا متزن نفسيا؟!
لقيت ان متزن نفسيا دي يعني حاجات كتير اوي ونعمة كبيرة من ربنا ،
متزن نفسيا يعني أحسن واحد يكبر دماغه في التفاهات، ويسامح بس مايتلدعش من موقف مرتين ولو تلاتة مليون جرس إنذار يضرب جوايا ،
مافيش حاجة تغريني وراحتي النفسية أهم من أي شئ،
بكره الصراعات والمتصارعين، ولا أنتمي لشئ لا ينتمي إلي!!!
نيجي بقي لتعملها ازاي دي؟!!
مانا قولت، اقعد كلم نفسك وحاسبها وقول ل الغلط جواك دة غلط ومش هفوتهولك، لكن دون ان تقسو علي نفسك ابدا ابدا وأي محاولات للقسوة علي نفسك هتحول الانسان اللي بيسمعك (اللي هو انت) لواحد مش طايق قعدتك وعايز يهرب من قرفك، لان في الأخر انت بشر وبتغلط وهتغلط وهتفضل حياتك في مشقة وحزن احيانا وفرح أيام أخرى ، سامح نفسك علشان لما تنتقدها تسمعك وتصدقك… خليكم اصحاب!
هدف وقيمة الحياة هي الأساس، ماتخليش حاجة تشتتك عن طريقك، هتقع الف مرة بس خلي بالك ان الوقعة في منها حكمة، دور عليها وعيدها علي ودنك كل شوية بصوت عالي زي مثلا (ماتغضبش بسهولة، أستر علي الناس علشان ربنا يستر عليك، كان ممكن تبقى انت في موقف الضعف دة فهون على الناس بكلمة، ماتسيبش شغلك تتفرج على ماتش هما بيشتغلوا ويكسبوا وانت كمان لازم تشتغل وتكسب ماتتفرجش عليهم!)
حاجات كتير كدة بتتحول من مجرد صوت جواك، لشخصية ” متزنة نفسيا ” رغم ان في اتنين جواك مقطعين بعض
تفتكر وانا بكتب دلوقتي مين في الاتنين اللي بيكتب
فالحمد لله علي الإتزان حمدا كثيرا طيبا مباركا فيه…
حب نفسك وفوتلها بس من غير ماتبين لها
