د. ياسر جلال يكشف السبب الاساسي وراء الخلافات بين الاهلي والزمالك

مقارنة بين موقف الأهلي والزمالك في موضوع أرض أكتوبر ، ورغم ان كان في طرف تالت في القصة إلا أني تجاهلته تماما …. الطرف ده هو مين ؟!! …. هو نادي الترسانة
طب ليه تجاهلته عامدا متعمدا برغم مطالبة البعض اني اتكلم عن موقف الترسانة ، الا اني تجاهلت ده لغرض في نفسي لأن الموضوع فعلا في منتهى الخطورة ويبينلك قد ايه الزمالك بيتعامل مش بس معاملة الطفل المدلل الوحداني ، دا كمان فوق اي قانون او عرف او لائحة
قولنا ان الاهلي والزمالك والترسانة استلموا اراضيهم تقريبا في 2004 ، الزمالك والترسانة استلموا الاول ارضهم جنب بعض في 2003 ، وبعدين بعد ما تم حل مشكلة تخصيص ارض الاهلي استلمها في اول 2004
في شهر يونيو 2012 وتحديدا يوم 6 يونيو ، بيجي تحذير شديد اللهجة من هيئة المجتمعات العمرانية الجديدة لمجلس إدارة نادي الترسانة برئاسة حسن فريد بسحب الأرض المخصصة لنادي الترسانة وده لسببين :
السبب الأول هو عدم قيام نادي الترسانة بسداد أقساط الأرض في المواعيد المحددة ليها من سنة 2010
السبب الثاني هو عدم قيام نادي الترسانة بعمل أي انشاءات في خلال ال8 سنين تثبت جديته في انشاء فرعه في مدينة 6 أكتوبر وإن الارض المخصصة ليه لم تستخدم  في الغرض ده
حاول حسن فريد انه يقول ان هيئة المجتمعات العمرانية الجديدة ما تقدرش تسحب الارض منه لأنها غير ذات صلة ، وضاف على كلامه ان اكيد الدولة مش هتسحب ارض من نادي بيخدم 35 ألف عضو وانه هيرفع دعوه  قضائية وان الدولة ممعهاش ال2 مليون جنيه قيمة الفلوس اللي دفعها نادي الترسانة للدولة كدفعة اولى مقابل الارض ….. الكلام ده مش بيفكرك بكلام حد ؟!!
كان رد الدولة عليه ايه ساعتها ؟!!
طالبت هيئة المجتمعات العمرانية نادي الترسانة في خطاب رسمي بارسال مندوب عن النادي لاستلام ال2 مليون جنيه مقابل سحب الأرض ، لكن حسن فريد تجاهل الموضوع خصوصا انها كانت فترة انتخابات وكمان لأن الموضوع لا يعنيه لأنها كانت اخر فترة ليه بعد تطبيق قانون ال8 سنوات
طب الدولة عملت اييييييييه ، الله ينور عليك هو ده السؤال ؟!
جات الدولة المصرية يوم 19 يونيو – بعد 13 يوم من خطاب التحذير – ممثلة في هيئة المجتمعات العمرانية الجديدة وسحب الأرض المخصصة لنادي الترسانة نهائيا لحين البت في قضية تمديد الانتهاء من الفرع من 3 سنوات ل5 سنوات ، في الوقت اللي كان الاهلي والزمالك بيحاولوا يخلصوا فروعهم ف يالمدة المحددة ، لأن نادي الترسانة لا سدد اقساط ولا عمل اي مباني فى الارض بتاعته
مين بقى اللي اتطبق عليه قرار سحب الاراضي ده غير الترسانة ؟!
القائمة كانت بتضم أندية الاتحاد السكندرى، وسبورتنج، والصيد، وسموحة وكلهم اتسحبت منهم ارضيهم لنفس السبب
بعدها طلع قرار المد نتيجة للظروف السياسية للبلاد وقتها ، وفعلا الاهلي استفاد من بند السنتين الزيادة وقدر ينتهي من النادي في سبتمبر 2014 ويفتتح الفرع رسميا في 22 مارس 2015
مين بقي اللي لم يطبق عليه أي قانون أو لائحه
بالظبط كده …. نادي الزمالك مدلل الدولة و اللي علي الحجر اخر العنقود واللي فوق اي قانون ولايحة  اللي كان حاله حال الترسانة وسبورتنج والاتحاد والصيد ، لا سدد الدفعات اللي عليه ، ولا بنى طوبة واحدة جوا النادي ، ولا اتسحبت منه الارض ، ولا حتى حد رفع منديل ورق في وشه يهدده بيه
لا ومش بس كده …. الارض اللي متخصصه له عشان يبني فيها نادي خدمي لاعضائه بقى بيستخدمها لاغراض استثمارية ويبيعها لمستثمرين عشان يعملوا فيها ابراج ومولات ومباني بخلاف الغرض اللي متخصصه له
ومش بس كده ، بقوا كل سنة لما يتزنقوا في فلوس يروحوا جايبين كام لودر على قلاب رمل على حفار ويروحوا هناك ويقولك البدء في مشروع الحلم قصاد حجر الاساس اللي اتبنى مليار مرة ، ويروحوا طالعين علي البنوك واخدين كام مليار على حسهم يفكوا نفسهم بيهم ويسدوا مديونياتهم ويفتحوا القيد …. والسنة اللي بعدها نفس الفيلم ونفس الطريقة والبنوك اللي بتديهم قروض محدش قالهم انتوا بتعملوا ايه
لييييييييييييييييييه ؟!! ، مش انت سألت ـ اجاوب أنا سيادتك
لان قايمة البنوك اللي الزمالك بياخد منها قروضه اعضاء مجالس اداراتها والمسئولين فيها كانوا مسئولين سابقين في نادي الزمالك ، منهم بنك تجاري دولي كبير وبنك وطني كبير برضوا ……. فعادي الزمالك قاعد طول عمره يعمل اللي عايزه وبياخدوا قروض من قوت الشعب بالعبيط ومحدش بيقولهم انتوا فين وايه الضمانات …. عشان الضمان ارض 6 أكتوبر اللي الزمالك ما يملكهاش اصلا ، فبقى قرض من لا يملك يروح لمن لا يستحق وحاجة في منتهى وعد بلفور يعني
المهم ان الدولة مددت للزمالك من 2012 لحد النهاردة اكتر من 7 مرات كل مرة كانت بسنة او اتنين وكل مرة احنا هنبني احنا هنخلص ، ادينا اهوه بنشتغل ، 5 دقايق وداخل عليك …… وما اتحطش حتى اساس لعشة فراخ او مزرعة بط من يوم ما اتعمل سور النادي في 2004
ويطلع  كابتن شيكابالا جاي يقول انا معرفشي مين الغلطان بس بالله عليكم احنا واخدين فلوس على حس الارض دي ولو اتسحبت هيبقى زينا زي الاسماعيلي …… يرضيكم نبقى زي الاسماعيلي ؟!!!!!
لا يا كابتن شيكابالا ميرضناش طبعا انكم تبقوا زي الاسماعيلي اللي بيصارع الهبوط بقاله 20 سنة ، ولا زي الترسانة جاركم في ميت عقبة واكتوبر سابقا اللي في الدرجة التالتة …. ولا ينفع تبقوا زي الاتحاد وسموحة وسبورتنج لان اكيد الدم الزملكاوي انضف من الدم الاسكندراني ، ولا ينفع تبقوا زي سبورتنج ولا زي نادي 6 أكتوبر
انتوا يا كابتن على راسكم ريشة ، هما ولاد البطة السودا وانتوا ولاد البجعة البيضا ،هو ينفع  حد يتساوى بيكم ، لازم ارض اكتوبر ترجع عشان المصلحة تفضل مكملة ودايرة القروض اللي من دم الشعب تفضل شغالة عشان نعالج كل مصايبكم وبلاويكم وسوء اداراتكم المتتابعة وقرارتكم الكارثية عشان الدلوعة اللي واخد على اكل السيرلاك في بوقه ما ينفعشي يبقى زي باقي الشعب
كده قصة الزمالك بقت واضحة للكل ، هي واحدة من اكبر قضايا الفساد اللي موجودة في مصر ولم يطبق فيها معيار عدل واحد من اللي اتطبق على كل الاندية واولهم الاهلي اللي ضغط ميزانيته في اسوأ فترة اقتصادية للنادي بعد ثورة يناير عشان يلتزم بقرار الدولة ويخلص المشروع في وقته
لكن اللي بقاله 13 سنة واخد سماح وناهب قروض بالمليارات على حس الارض دي ومسئولين البنوك اللي بيسلفوه محدش قالهم انتوا بتعملوا ايه ولا القروض دي هتتسدد ازاي ، ورجعونا لزمن نواب القروض الجميل لما كانت شحنات شقى وتعب الشعب ده بتطير على سويسرا لحد ما فقروا البلد وجابوها الارض
الموضوع اكبر من ارض اتسحبت من الزمالك او دلع نادي على حس محبيه، انت لو مشيت ورا الخيط وحاسبت بالورقة والقلم وبالقانون في ناس عمرها ما هتشوف الشمس تاني من اول “جنايني” الفيلا لحد اشرف القوم.

وكفايه كده ونكمل بعدين