د. خالد حامد … الملبس والشيكوبون ينفع علاج للقلب يا دكتور
حسام النعماني
دكتور انا بيجيلي نغزة في صدري فباخد قرصين اسبوسيد ارتاح علطول
_طيب جربت تاخد ملبس؟!!
=ملبس، لأ!
_جرب تحط شيكوبون في علبة الاسبوسيد، ولما تحس بنغزة خد منه اتنين، وبردو النغزة هتروح وتتحسن
عارف ليه؟!! علشان اللي انت بتعمله دة اسمه علاج بالإيحاء placebo effect >> يعني انت معتقد انك لما هتاخد الدواء دة هيخفف الأعراض دي (حتى لو مش مناسب لحالتك ) فسبحان الله يخففك
زي مثلا انك تاخد قرص بنادول لمغص المعدة ،فمعدتك تخف!! ،فاهمني يامحمود؟
=يبقى الالم دة سببه اصلا اية يادكتور
_ نفسي ياحبيب قلبي، ولو ماخدتش له حاجة وبطلت الهلع والخوف اللي بتعمله دة هيروح لوحده
القلب مابيعملش ألم على شكل نغزات في الصدر، القلب لما يتعب بيبقي كأن حجر علي صدرك او سكاكين بتقطع مش شكة دبوس،
القلب مابيهزرش
النغزات قد يكون سببها نفسي او التدخين او دور برد عامل التهابات بغشاء التامور المحاوط للرئة
دكتور انا قلقانة جدا، وحسه اني هموت بجد؟!
ليه خير بتشتكي من ايه؟
حلمت حلم صعب ومن ساعتها تعبانة
خير اللهم أجعله خير؟ كابوس يعني وصحيتي علي ضيق نفس وضربات قلب سريعة
لا صحيت من النوم لقيت صوباع رجلي الكبير بيوجعني
_طيب مايمكن اتخبطي فيه
=لا خالص يادكتور، مشكلتي إني بقرأ كتير ودة له معنى واحد للاسف
_ايه هو؟
=روحي كانت هتطلع وانا نايمة بس صحيت الحمد لله، وصعود الروح بيكون من الصوباع الكبير ، هو فعلا يادكتور لو الواحد مات في الحلم بيموت في الحقيقة
_ سرحت بخيالي ” لو كان مدرب المقاولين قبلني في التشكيل وكملت كريري في الملاعب كان زماني اكتر حاجة بتضايقني ان الكورة تطلع أوت او أتزحلق وانا بشوط
= يادكتور، يادكتور حضرتك سامعني؟!، روحي كانت بتطلع من صوباع رجلي الكبير، اللي بيموت في الحلم بيموت في الحقيقة؟!!
” فاكر ياخالد سوأل الإحصاء الإجباري في الثانوية العامة اللي ماكنتش فاهمه وغشيت فكرته من زميلك، لو ماكنتش عملت كدة، كان زمانك مالحقتش كلية طب وبقيت لعيب كبير في نادي المقاولين.
يادكتور، يادكتور هو مش فعلا الروح بتطلع من صوباع الرجل الكبير
“لما كنت في إبتدائي كانوا مسميني “هاجي” _كان أحرف لاعب في كاس عالم ٩٤ _ كنت بلعب في الشارع وعدى راجل كبير ومسك إيدي وقالي>> انت مستقبلك هيبقى كبير في الكورة، ماتخليش الدراسة تضيع مستقبلك، حسيتها علامة من ربنا بس انا ماسمعتش كلامه
=يعني يادكتور وجع الصوباع الكبير مالوش علاقة بتوقف عضلة القلب؟!
_ ” لما اتولدت قالولي انت جيت غلطة، وماكنش اصلا المفروض تكون موجود، ولكن قضاء ربنا فوق كل شئ، رحمتك يارب”
_دكتور انت مابتردش عليا ليه
_نعم؟
_ لما قومت وصوباعي بيوجعني دة مش معنه ان روحي كانت هتطلع وقلبي هيتوقف وانا نايمة
