الخبير الأمنى اللواء خيرت شكرى يكتب..بعيدآ عن مهرجان الجونه
متابعة عادل شلبي
بعيداً عن مهرجان الجونة ، ولبس الفنانين ، والراجل اللي أتقلب فرخة ، فجأة وبلا مقدمات ، نشطاء يناير بدأوا يظهروا تاني من جديد ، في محاولة لأعادة أحياء الفترة اللي ربنا ما يرجعها علينا تاني ، بس المرة دي بهدوء و على نار هادية ، المختفي منهم بدأ يطلع ، والهربان رجع ، والنائب الوطني طلع مش وطني ، وما صدق المشير توفى ، وقالك كده نبدأ ناخد عزا شهداء يناير ، حتى القوة الناعمة طلعت مش ناعمة .
طبعاً كل ده والإعلام شغال الله ينور ، سايبنا نهاجمه ومدينا ضهره ، في حاجة مش مظبوطة ، في بجاحة وتحدي في الكلام والتصرفات ، حا نروح بعيد ليه ، شوفوا خالد يوسف مع عمرو أديب بيتكلم أزاي ، وشوفوا عمرو أديب بيقدمه أزاي بعد رجوعه من فرنسا ، شوفوا المنتج محمد حفظي بيتكلم ازاي على منتقدي فيلم ” الريش ” ، وشوفوا أعماله اتجاها ايه ، شوفوا فيلم ” ريش ” بياخد جائزة في مهرجان الجونة ، رغم الانتقادات ورد الفعل الشعبي تجاه الفيلم في تحدي سافر ، وتيجي منى الشاذلي تستقبل بعض عناصر الفيلم في برنامجها التليفزيوني ، في تحدي أيضا سافر .
انا عايز بس أقول للناس دي حاجة ، إن التاريخ مش بيرجع لورا ، واللي حصل في ٢٠١١ مش حيتكرر تاني ، أظن العبارة دي سمعناها قبل كده من أعلى سلطة ، لكن الأهم من كده ، واللي لازم تعرفوه ، إن حزب الكنبة قاعد مصحصح وواعي وراصد كل اللي بيحصل ، و اوعوا تصدقوا إن حزب الكنبة مشكلته ” بطنه ” زي ما بتحاولوا تروجوا ليه ، لأ يا كاره ناسك حزب الكنبة دايماً مشكلته كرامته وبلده ، و طبعا إنتوا فاكرين ثورة ٣٠ يونيو ، اللي طردت الإخوان من حكم مصر بلا راجعة ، دا بعد مانتم ركبتوا الإخوان حكم مصر …. مش كده ولا ايه ( بصوت الفنان فؤاد المهندس ) .
