د.نسرين النحار ..تكتب..اختلاف بشر

ما بين السطور

كلنا شايفين الصفحة اللي فيها سطور واضحه ومتسطره بشكل واضح بعرض الصفحة

لكن فيه سطور مابين السطور (يقولك اقرأ مابين السطور ) وسطور تانيه مابين اللي بين سطور

ونلاحظ ان تكوين الصفحة نفسه عباره عن سطور

فيه ناس مش بتشوف غير السطور الواضحة والصريحه ودول ناس مينفعش تتعامل معاهم غير بوضوح وصراحة خالية من التجريح والألم والصدمات ,

كل الموضوع أنهم مش حيفهموا إنت عايز إيه او بتقول إيه غير بشكل واضح وضوح السطرر في الصفحة البيضاء ومعظمهم بيكون ممتن ليك لمجهودك انك تساعده يفهمك

وفيه ناس تانيه لازم تمشي ما بين السطور سطر سطر لحد ما تقدر توصل فكرتك ليهم وتشرح بالراحه وتمهل إلى ان تصل الى السطر الصريح اللذي يليه حتى يستطيعوا استيعاب ما تريد إيصاله لهم ومتسبش سطر من السطور إلا لما تتاكد انهم فهموه

وفيه ناس ثالثه مجرد ما عينهم تيجي على الصفحة يلمحوا معظم الأسطر او كلها ويقدروا يعرفوا المكتوب بيقول ايه وعايز توصل لايه ( دول اقليه أو أغلبيه محدش يقدر يعمل إحصائيه لكن مش دايما بنقابلهم حتى لو كانوا منتشرين ) كل الموضوع انهم مبياخدوش وقت ولا مجهود ولا طاقه في إنك تشرح وتحاول تفهمهم حاجه وبيكونوا مريحين وسريعين في إتخاذ خطواتهم في الحياة

كدا بنثبت ونوضح أن فيه إختلاف بين البشر و أن عدم التساوي بينهم في وجه من أوجه إختلاف الحياة لا يعيب البشر في شيء وأن علينا تقبل الاختلاف في صفاته الفطريه اللتي فطر الخالق عليها خلقه فأصابع اليد الواحده مختلفه حتى وان كانت تنتمي لكف واحد وفي ذراع واحده لنفس الجسد الواحد لشخص واحد (عاملوا الناس على قدر عقولهم )