٠. نصيحه مجرب
ماجده حسين
كلمه للبنات اللي داخله علي جواز لماتتجوزي وتلاقيي الاكل بتاع حماتك معمول بطريقه مختلفه عن اللي كنتي متعوده عليها متقولبش لاء مش هاكل لاء ادي لنفسك فرصه ودوقي الاول مره واتنين والتلته دي هتبقي اتعوتي وحبيتي الطريقه دي انا واحده من الناس اول لما اتجوزت قولت ايه ده اكلهم غريب عن طعم الأكل بتاعنا امي ربنا يبارك في عمرها ويعطيها الصحه قالت ليه كل دار وليه مدار البيوت مش زي بعضها
وفعلا بقيت احب الاكل بالطريقه بتاعتهم واصناف مكنتش باكلها لما كلتها حبتها مثال لذلك القلقاس الأخضر كنت بستغربه جدا طلع تحفه واحلي قلقاس بقيت اعمله بطريقتهم وبقيت اعشق الاكل بالتوم زيهم
الهدف من كلامي مش الاكل بس لاء
الهدف بلاش ناخد انطباع علي حاجه من غير من جربها عملي حماتك زي ماتحبي مرات اخوكي تعامل امك تعاملي بحب هتلاقيكي النتيجه حب والحياه بتمشي
هتقولي حماتي مش ملاك هقولك اعملي الخير لوجه الله هيعوضك وهيراضيكي وكله في ميزان حسناتك
اه وفي نفس الوقت متجيش علي نفسك اوي كل حاجه بالمعقول بتبقي حلوه
طب انا بقول الكلام ده ليه
علشان بسمع مشاكل عن ناس لسه متجوزه بسمعها منهم شخصيا القي الموضوع كان في الاصل بسيط وكبر علشان بنقف لبعض علي الوحده والنتيجه بتوصل احيانا للطلاق
وياريت الزوجه والزوج يخلو المشاكل بتاعتهم بنهم وبين بعض حتي لو اتخصمتم يوم اسبوع او حتي شهر بس صدقني بعد كدا هتتعودو علي طباع بعض وفي نفس الوقت محدش من اهلك بشيل منه ولا حد من اهله يشيل منك
والمثل بيقول داري علي شمعتك تقيد
المثل مش بس الحاجات الحلوه اللي خايفين عليها من الحسد لا كمان المشاكل علشان متكبرش لما حد غيركم يدخل في حياتكم
وفي نهايه كلامي ورغي الكتير يارب اصلح حال ولادنا جميعا وبناتنا وارزقهم السعاده في حياتهم والإستقرار والحب والذريه الصالحه
واللهم صل وسلم وبارك على سيدنا محمد وعلى اله وصحبه اجمعين
