وبما ان المدارس بكره شهر زاد بتنزل وصفات سهله للانش بوكس والاولاد يحبوها
الاء مجاهد
أول وصفه هنعملها هتكون بسكويت الجبنة الرومى هش ومقرمش ومناسب جدا للمدارس.
وطريقته سهله جداً
يلا نشوف هنعمله ازاي:
المقادير.. هنوحد الكوبايه اللي هنعاير بيها.
كوبايتين دقيق منخول.
كوباية او كوبايه الا ربع من الجبنة الرومى المبشوره ناعم
وممكن تفروميها في الكبه او مطحنه التوابل.
نص كوباية او اقل من المايه او اللبن
معلقتين كبار من الزبدة بدرجة حرارة التلاجة او بدل الزبده ممكن تحطي معلقه ونص سمنه نوع كويس.
معلقة صغيرة من البيكينج بودر
ربع معلقه صغيره ممسوحه من الملح
بيضة واحدة
الطريقة:
هنحط السمنه او الزبدة على الدقيق ونفركهم كوىس بإيدينا لغاية ما يبقى الدقيق زى الرمله المبلوله.
بعدها بنضيف الجبنة الرومى ومعلقة البيكينج بودر ورشة الملح ونقلب كل المكونات مع بعض كويس جدا عشان البيكنج بودر والجبنه الرومي يتوزعوا كويس مع الدقيق.
وبعدين هنحط البيضه ونقلبها مع الخليط لغاية ما تتجانس مع بقيت المكونات والبيضه تختفي.
وآخر حاجه هنضيف نص كوباية اللبن او المايه شويه بشويه لغاية ما تتكون معانا عجينه متماسكة وسهلة فى التشكيل وما بتلزقش فى ايدينا ممكن نستخدم نص الكوبايه وممكن نستخدم اقل لأن نوعيه الدقيق بتختلف.
هنسيب العجينة نص ساعه فى التلاجة ترتاح وبعدين نطلعها ونفردها بين كسين بلاستيك نضيف عشان تتفرد معانا بسهولة ونوصلها لإرتفاع وسمك حوالى نص سم او أكتر شوية.
بعدين نبتدى نقطعها بأى أشكال إحنا حابينها ونرصها فى صينية أو صاج مدهونه دهنه بسيطه من الزيت.
وندهن وش البسكويت بخليط مكون من معلقة من الحليب عليه رشة صغيرة جداً جدا من النسكافيه ورشة صغيرة جدا جدا من السكر ونقلبهم كويس وندهن بيهم وش البيسكوت كله ونرش سمسم أو حبة البركة على الوش حسب ما انتي حابه وممكن نضيف جبنة رومى أو موتزاريلا.
هندخله الفرن على درجة حرارة ١٦٠ أو ١٧٠ اقل من المتوسط بشويه صغيرين لغاية ما ياخد لون ذهبى من فوق ومن تحت.
وكده خلاص نطلعه ومانحركهوش خالص الا لما يبرد تمام بعد كده عايزين نحفظه بقا عشان نخليه عندنا ويبقا جاهز وقت المدرسه بعد مابرد هنسيبه ١٢ساعه بره من غير ما نعمل فيه حاجه وبعدين هنحطه في علب بلاستك او كرتونه صغيره ونقفل الكرتونه ونشيلها في مكان ميكونش فيه حراره هيقعد معاكي لغايه شهر كده هيبقا جاهز عندك وتطلعي من العلبه تحطي في اللانش بوكس جربيه وان شاءالله هيعجب اولادك.
