د. خالد حامد يكتب … حكاوي القلوب… هو الكلام بيخفف؟!!!
طيب خد المعلومة دي 40% من كشوفات المرضى بعيادات القلب في العالم ماعندهمش مشاكل بالقلب.. مش مريض قلب اساسا !!!.. هو بس قلقان وخايف ليكون عنده حاجة في القلب، ودة بعد الكشف والفحص والتأكد من سلامته بيكون علاجه ” كلام”!.. والغريب بقى انه بيخف بعدها!
اه صعب تطمن حد بيشتكي من وجع في صدره الا بعد العرض علي طبيب وهو بنفسه اللي يطمنه _ أكل عيشنا بردو
لكن كمان الكلام المؤذي بيجيب المرض!!!
الكلام المؤذي بيدمر شخصيات بكامل أعضائها، عضويا بيزود سرعة ضربات القلب ويرفع الضغط وقد يؤدي لحدوث جلطة بالقلب غير ارتفاع السكر بالدم وارتفاع معدل حدوث سكتة دماغية ، اما علي الجانب النفسي معاك بقي من اول الأرق مرورا بتكوين شخصيات ضعيفة غير متزنة نفسيا، وصولا للأنتحار!
علشان كدة بكون حريص جدا لو مريض جاي يطمن وفعلا بعد الفحص يتضح انه سليم ” ان شاء الله” ، مش لازم اخرجك مريض وأقعد اخترعلك مرض يرضي أعراضك !!!.. هقولك انت سليم وعيش حياتك واتبسط، وقلل الضغوط اللي عليك ، انزل اجري والعب رياضة، روق علي حالك ياعم ماتكئبناش
زمان ماكنش في دكتور يطلع في فيلم عربي غير لما يقول للمريض انت كويس ومحتاج تروح تشم نفسك يومين في العزبة ويقوم مشخبط شخبطين في الروشتة، ويجي المشهد اللي بعده الراجل رايح العزبة العربية تتقلب بيه .. فمبقناش نقولها دلوقتى
الكلام بيريح جدا، وله تأثير كبير علي سلامتك النفسية، عود لسانك علي الكلام الطيب النضيف، وماتخليش الناس تسمع منك مايؤذيهم، واتكلم دايما مع اولادك وزوجتك وابوك وامك ” وقل لهما قولا كريما” بأمر ربنا…
الكلام دوا ببلاش ياعم ومفعولة احسن من مليون برشام
