تعرف على الفنان الذى لقب “عظمة”

تبض الوطن

أغلب الناس تعرف الراجل ده من صورته، وحافظة كويس اوى جملته الشهيرة فى فيلم “الارهاب والكباب”، لما كان بيرد على عادل امام لما سأله :” مفيش حاجة هترخص ؟؟” فرد وقال : “حاجات كتيرة هترخص وهتبقى بسعر التراب انا وانت والاستاذ وحضراتهم اجمعين .. جتكم ستين نيلة “، الراجل ده يبقى عبدالعظيم عبدالحق، أو “عظمة” زى ما كانوا بيقولوا له فى الوسط الفنى.
“عظمة” بدأ مشواره فى سن كبير، وتحديدا فى عمر 55 سنة، ورغم كده نجح أنه يشارك فى 70 فيلم، وبخلاف أدواره، ودى حاجة ممكن تكون مفاجأة لناس كتير، فـ “عظمة” له 500 لحن متسجلين فى الاذاعة .. اه والله زى ما بقولك كده.. مستغربش الراجل ده هرب من بلده وجه القاهرة عشان يدرس الموسيقى بعد ما اسرته رفضت فكرة انه يتعلم موسيقى عشان ميبقاش “مزيكاتى”.
تعرف او تسمع تتر مسلسل “الرحيل “، ومسلسل “هارب من الأيام” و “الضحية” عظمة هو اللى عملهم ، طيب تعرف أغنية “الصيادين” لكارم محمود ، “تحت الشجر يا وهيبة” لمحمد رشدي ، “وحدة ما يغلبها غلاب” لمحمد قنديل ، “في قلبي غرام” لمحمد عبدالمطلب ، “سحب رمشه ورد الباب” لمحمد قنديل ، برضه الراجل ده هو اللى ملحنهم، مش كده وبس “عظمة” فضل لمدة 4 سنين “مطرب الملكة نازلي” فى حفلاتها اللى كانت بتعملها فى القصر، وكان رافض فكرة انه يحترف الغناء لأنه شايف أن صاحب بالين كداب، يعنى مش هيعرف يلحن ويغنى فى نفس الوقت فقال خلينى فى التلحين أحسن.. وقد كان