شئ مُحال

بقلم / شكرى راجح

كنت ناوى اكتب شعر فى عنيكى كنت ناوى
غاوى شعر وبكتبه ولسه غاوى
بكتبه من اى بحر فى اى وقت
وياما قالوا عنى حاوى
لكن عنيكى ضاعت فيها حرفتى ورجعت هاوى
غاوى شعر وبكتبه ولسه غاوى
بس اللى شاف عنيكى وحب يوصف اد ايه فيها الجمال
زى الى راح البحر لجل يعد حبات الرمال
زى اللى شاف القمر افتكر يقدر يطوله لو طلع فوق الجبال
صدقينى شئ مُحال وانتى اجمل مالجمال
انى اوصف اد ايه فيكى الجمال
شئ مُحال
صدقينى واعذرينى لو مكتبش فيكى شعر
لو فعنيكى بس اكتب عُمرى عايز تانى عُمر
لجل اعرف لون عنيكى
امتى يكونوا لون البحر
امتى يكونوا لون النهر
امتى يكونوا لون الليل
امتى يكونوا لون الفجر
لجل اعرف كلام عنيكى
امتى يكون قسوة هجر
امتى يكون لعبة مكر
امتى يكون همسة سحر
امتى يكون نشوة سُكر
امتى يكون نهى وامر
لجل اعرف عنيكى
لجل اكتب فيها شعر
عايز اسرح فى عنيكى الف شهر
والف شهر لجل اشطب كل كلمة كتبتها
والف شهر اقدم فيها الف عذر
لأنى معرفتش مقامى !
حاولت اوصف اللى ميقدر يوصفه اى شعر
مهرك ياحلوة من عنيا ادفعه الف مهر
طلبك ياحلوة صدقينى بسمعه امر امر
لكن لو كان طلبك ياحلوة
انى اكتب فيكى شعر
صدقينى شئ مُحال وانتى اجمل مالجمال
انى اوصف اد غيه فيكى الجمال
شئ مُحال
اوعى تغيرى من شعر كان قبلك اوهام
انتى الحقيقة ازاى تغيرى من احلام
كنتى فخيالى كنتى الوحى والإلهام
كنت بحلم بيكى كنت مستنيكى
شعرى قبلك كان كله ليكى
بس ما كنتش لاقيكى
كنت ما شفتش عنيكى
وشفتها .. حاجة اجمل مالخيال
عرفت انه شئ مُحال
انى اوصف اد ايه فيها الجمال
شئ مُحال