عشان تكمل الحبكه
الأديبه الشاعره : نهى حــمـزه
متعنا الله بالصحه
دى رعشة يد
ونبضة قلب
ولا كورونا مع كحه
ولا .. عمرنا سبق خطوه ؟
بيجرى ليه ويستحلى
بتجرى كمان !!
سايقنا ليه على كيفك
كأنه جنان
واحنا يدوب … لمحه من طيفك
وعلى كيفك مشغل الدربكه
عشان تكمل الحبكه
شويه شويه وإتمخطر
نجيب عنبر نجيب سكر
دا حتى أن متنا هنتعطر
خليك لطيف
خفيف خفيف
شوية كحه مش أكتر
يكونش حب
وسهر وغلب
وإنت يا عم العمر
نازل فينا طيخ طاخ
مفيش سماح !!
طب حب إيه
والصحه ماشيه وبتسبنا
وكورونا قال جايه تعاتبنا
بتدلع الكحه
وتقول دى بحه
وجميله من صوتنا
ملبسانا كمامه
راسمه عليها شامه
عامللنا فيها علامه
وان من حبنا دوبنا
دا القهر دوبنا
ياعمر إتكلم
وعلى صوتك وقول
مين ضحك على مين
كورونا ولا الحب
ولا الوقعه كرب فى كرب
وميفرقوش عن بعض
وعلينا متفقين
مين يا دنيا ضحك على مين ؟
