د. خالد حامد .. ماتعملش فيها دكتور علشان ماتبقاش زي الدبة اللي قتلت صاحبها
ماتعملش فيها دكتور علشان ماتبقاش زي الدبة اللي قتلت صاحبها.. كان في دبة بتحب صاحبها اوي
1= (بابا كانت ضربات قلبه سريعة وعنده نهجان جامد ومش قادر ياخد نفسه.. روحنا بسرعة خدنا جلسة تنفس فاركولين.. تعب بعدها وحصل ماية علي الرئة واتحجز في الرعاية المركزة) !!!
_ بابا ماكنش محتاج جلسة تنفس.. بابا كان عنده ذبذبات اذينية ورفرفة بالقلب ادت لحدوث سرعة شديدة بضربات القلب.. بدل ما ضرباته الطبيعية 70 بقت 170 وكانت تستدعي العلاج الدوائي بمنظم ضربات القلب علشان تهدأ وبالتالي نفسه يرتاح.. لكن لما خد الفاركولين بيزود ضربات القلب اكتر ووصلت ل 200 فحصل ارتشاح رئوي وفشل في وظائف التنفس وهو دلوقتي علي جهاز تنفس صناعي
2 = (احنا عارفين اللي عندة وجع في صدره وأشتباه جلطة في” القلب” بنديله 4 اقراص اسبوسيد بسرعة علشان تدوب الجلطة قبل مايروح المستشفى.. ابن عمي بقي جاله جلطة في ” المخ ” وبقه اتعوج وايده ورجله اليمين مابقاش عارف يحركهم.. فاديتله بسرعة 4 اقراص اسبوسيد.. عقبال ماوصلنا المستشفى اغم عليه ودخل الرعاية المركزة) !!! بردو
_ الكلام دة ينفع لو اشتباه جلطة بالقلب ماشي.. لكن المخ ممنوع تماما إعطاء المريض اي ادوية سيوله قبل عمل الاشعة المقطعية علي المخ.. لانه ممكن يكون سبب التعب >>> “نزييييف ” بالمخ مش جلطة وبالتالي لما تديله ادوية سيولة زي الاسبوسيد النزيف بيزيد والمخ بيتأثر فيه جزء اكبر واكبر.. وبدل ما كان ايد ورجل بقوا الاربعة وعايزين حد يشيله ويحطه
3 = اخويا مدخن شره وعنده ضغط بس مش بيحب ياخد علاج.. كان عنده وجع في نص صدره جامد بكتفه الشمال.. جبتله مجموعة البرد وحقنة فولتارين نام وصحي الصبح الوجع راح الحمد لله بس بقي بينهج مع اقل مجهود) !!! ولا مستشفي ولا رعاية.. اي خدمة..مجموعة البرد دي سحرية
اخوك ماكنش عنده برد!!! .. دي اعراض جلطة بالقلب كانت تستدعي تجري بيه علي المستشفى ويعمل قسطرة قلبية عاجله لفتح الشريان التاجي المسدود.. هونت عليه الامر واديته مسكن اخفي الوجع لكن فقد جزء كبير من كفاءة عضلة القلب.. وبدل ما كان قدمنا فرصه لأنقاذه للاسف حصل تليف بعضلة القلب وبقت ضعيفة باقي حياته ولا يمكن ترجع لقوتها تاني.. ماقدمناش غير شوية ادوية ويبقي الوضع علي ماهو عليه
انا عارف والله ان الطب حلو واحساس انك تساعد مريض وربنا يجعل شفائه علي ايدك شئ عظيم.. علشان كدة عملوا كلية لدراسة الطب سبع سنين وبعدها 4 سنين ماجستير في تخصص دقيق..ساعتها بس يحق لك تبدأ ممارسة الطب.. غير كدة تأكد انك بتضر مش بتفيد…
المواقف اللي زي دي _في اروبا والدول المتقدمة بتكلم الاسعاف تجيلك علطول _ لكن عندنا انصحك يكون لك طبيب ثقة تكلمه ويوجهك تعمل ايه علشان تبقى حوت مش دبة
