الصحة النفسية ومفاتيحها بمناسبة اليوم العالمي للصحة النفسية
د.شيماء سليمان
والمفروض في يوم زي ده يا دكتور نقول لصحتنا النفسية كل سنة وانتي طيبة !!!
الأهم من إننا نقول لها إيه أو حتى نجيبلها تورتة ونطفيلها شمعة إننا نعمل لها تقييم
تقييم !!!يعني إيه؟؟؟ وازاي؟؟؟
يعني نخلي اليوم العالمي للصحة النفسية زي المنبه بالنسبة لنا اللي حيفكرنا نقعد مع نفسنا شوية ونشوف السنة اللي فاتت كنا بنتمتع بصحة نفسية ولا لأ ؟؟؟
في كده شوية مؤشرات لولقيناها عندنا يبقى بنتمتع بصحة نفسية
لما أحقق أهدافي ويكون عندي رضا ، قادر أواجه ضغوطاتي ومشاكلي من غيرما تأثربشكل سلبي على حياتي وعلاقاتي الاجتماعية ،أكون سعيد وعندي راحة نفسية ، متفائل ، طموح ، بحب وبتحب .
طيب هو في يا دكتور حاجات نعملها تزود من صحتنا النفسية ؟؟؟
آه طبعا في مفاتيح لتعزيزصحتنا النفسية
..صحتنا الجسدية مفتاح رئيسي لتمتعنا بصحة نفسية وده حيتحقق لما ننظم مواعيد نومنا وناخد القدر الكافي منه والأهم اننا ننام في المواعيد الطبيعية للنوم يعني بالليل مش بعد ما النهار يطلع ، ووجباتنا تكون صحية ومتوازنة ومننساش ثلث للطعام وثلث للشراب وثلث للنفس ، نمارس الرياضة بشكل شبه يومي أبسطها المشي رياضة مناسبة للجميع ومش مكلفة وممكن نمارسها في أي وقت وأي مكان .
..افهم مشاعرك وعبر عنها بطريقة مناسبة ومقبولة .
..اعرف احتياجاتك واسعى لاشباعها بوسائل ملائمة ومشروعة .
..قوي علاقاتك الإجتماعية مع عيلتك وأصدقائك واكسر روتين الحياة الممل بإنك تخطط لفسحة في اجازة الأسبوع ده مثلا ، ومتنساش كمان تدور على أنشطة جديدة تخليك تتعرف على ناس جديدة ، صدقني” معرفة الناس كنوز ”
..خلي العطاء من طباعك ،إنك تساعد محتاج حيخليك تحس براحة وسعادة .
..اتعلم فنون الاسترخاء زي التأمل في جمال الطبيعة ، تمارين التنفس العميق وغيرهم حيخلوك قادر على إدارة التوتر والقلق لواتعرضتلهم في أي وقت .
..دايما لما تيجي تحدد أهدافك ركز انها تكون مناسبة لقدراتك وإمكانيات والواقع كمان علشان تحقيق الأهداف دي حيمنحك زيادة الثقة بنفسك وشعورك بالسعادة .
..دايما ادي فرصة لاستعادة نشاطك مرة أخرى ، جسمنا أحيانا بيبعتلنا مؤشرات لازم نستجيب لها زي شعورنا بالإرهاق ده معناه إننا محتاجين قسط من الراحة .
..اتعلم إزاي تقول * لأ ” في المواقف اللي بتضطر تقول * نعم ” فيها وانت مضغوط تحت شعارأصل أنا بحبه واتكسفت أقوله ” لأ ” .
..دايما نقرب من أي حاجة ممكن تمدنا بالطاقة الايجابية ، خاصة العبادات بأشكالها المتعددة بمختلف الأديان لها أثر كبير وفعال بشعورنا بالراحة النفسية .
..وقت لما تحس إن عندك خلل في حياتك ومش قادر تتعامل معاه لوحدك متترددش إنك تطلب المساعدة من حد متخصص عنده مهارات وخبرة تؤهله إنه يساعدك تستعيد توازنك مرة أخرى لإن من حقك تستمتع بحياتك.
في النهاية عاوزة أقول إن الصحة النفسية زي البطارية اللي بتخلي الاجهزة تشتغل ومن غيرها تعطل وعلشان البطارية دي تقوم بدورها فلازم نشحنها كل فترة بس يا ترى بنشحنها صح ولا غلط
إحنا = الأجهزة
الصحة النفسية = البطارية
الشحن = المفاتيح الإيجابية اللي اتكلمنا عنها فوق
