القصه وما فيها
مصطفى العموري
.. أصل الحكايه كلها أحساس
مهياش فلوس ومناصب
دي القصه وما فيها حب الناس
وازاي تكون وسطيهم راجل
وتعيش وسطيهم باخلاقك مرفوع الراس
بس اياك تشتري وتبيع وتتاجر
دي مشاعر مش فجل وكرات
وخليك عارف مش شرط تكون م الأشراف
او انك تكون واصل او راجل واعر
ولا شرط برضو تكون كاتب او شاعر
بس اللي اكيد
أنك لازم للكلمه تكون واعي وفاهم
.. أياك تأذي أو تجرح ولا بلسانك ترمي رصاص
ضحكو عليك اللي قالولك اتنرفز واتعصب
والناس منك هتخاف
ده انت ياسيدي كده صدقني هتبقي مداس
او هيجيلك يوم تندااااااس
تبقي حريص مش بس صريح
تبقي رزين مش هيجان وصويت وصراخ
أوعي تسبب يوم حزن او اللي معاك يزرف دمعه
خليك دايما سبب الفرحه
طبطب ع الكل بحنيه .. خليك انسان
وخلي كلامك وكمان أفعالك ترن وتدوي ف الاذهان
ك الاجراس
هتبقي التاج وهتتشال فوق الراس
الأنسانيه دي اجمل لمحه في الشخصيه
ف متنساش
ان الموضوع كله موضوع احساس ..
