الفنان” حسن عبدالله”: مسلسل عيون القلب هو ابني البكري
حوار: نوران محمد
حسن عبدالله، ممثل مصري، خريج بكالوريوس نظم معلومات عام 2005،ثم التحق بالمعهد العالي للفنون المسرحية لتحقيق حلم طفولته في التمثيل، و كان له الحظ في التدريس علي يد الدكتور “هاني الطاوع “و دكتور “جلال الشرقاوي ” و غيرهم كتير.
من هو الداعم و مكتشف موهبه” حسن عبدالله “؟
في كتير بصراحه، المخرج” أحمد الهواري”هو اللي علمني أصول المسرح من بدايته خالص و انا في الجامعه و مجموعه معاونه معاه منهم”محمد رمضان، احمد البنهاوي، باسم الناوي”.
و لكن فعليا و احتراف علي مستوي المسرح الأستاذ “نصر عبدالمعنم” وعلي مستوي التليفزيون الاستاذ المخرج “محمد عبدالعزيز” و الاستاذ”علاء وجدي”.
هل التمثيل هو هوايتك الاساسيةام شئ اخر؟
التمثيل هوايتي الأساسية طبعا، بدأت تمثيل من سنة 2000 من بداية الجامعة، عندي هوايات تانيه بس التمثيل هواياتي الأساسية.
كلمنا اكتر عن بدايتك في التمثيل ؟ و اي إحساسك لأول عمل ليك و ممكن تنجح و ممكن لا؟
بدايتي في التمثيل كانت في الجامعه، في البداية كنت حابب أقدم فنون مسرحيه بس والدي كان رافض و كان عاوزني اخد بكالوريوس بعد الثانوية و بعد التخرج ادخل فنون مسرحية.
بدايتي الفعليه كانت علي مسرح الجامعه و شاركت في مسرحيات و اتعلمت منها كتير.
مسلسل” لما كنا صغيرين “كلمنا اكتر عن المسلسل و دورك فيه؟
هو من تأليف الأستاذ ” أيمن سلامه” و اخراج الأستاذ “محمد علي” و دا تالت عمل ليا مع الاستاذ”محمد علي” و كان ليا فتره كبيره مشتغلتش معاه من بعد العمل التاني، و قال ان الدور مهم و كبير و كان فارق معايا
جدا انه واثق فيا.
و كنت بعمل دور ضابط و دا كان مهم اني افرق بين الدور ده و دور الضابط اللي عملته قدام الرئيس في احتفاليه الشرطه، و فعلا قدمت الشخصية باختلاف في كل حاجه حتي الملابس.
المسلسل فرق معايا و اتعلمت من الاستاذ “خالد نبوي” كتير و المسلسل بطولة”ريهام حجاج”
و اتمني اشتغل مع الكاست دا تاني.
و شرف ليا امثل لتاني مره مع الفنان”محمود حميده”و هو مثلي الاعلي في الفنانين.
كلمنا أكتر عن كواليس مسلسل” ولاد تسعه”؟
المسلسل دا حكايه كبيره اوي، المسلسل دا بحبه جدا، أشرف و بسمه عملوا بصمه كبيرة جدًا، و أشرف كان الفارس لمعظم البنات، و أشرف أقرب شخصية قدمتها قريبه لشخصيتي الحقيقة.
و طبعا التمثيل مع الفنان” بيومي فؤاد “كان خبرة تانيه ليا و بتعلم من خبرته كتير و هو بالنسبالي اختبار حرفيه ك ممثل لانه عنده ملكه مختلفة و لازم ذهنك حاضر لان ممكن يحصل ارتجال و انت علي الهوا،و اتمني يكون في جزء تاني للمسلسل.
من هو الممثل الذي ترغب في العمل معه خلال الفتره القادمه؟
أحب أمثل قدام كل نجوم مصر لان دا هيفرق معايا و بقوة، و تقريبا مثلت مع معظهم، بس أتمنى أمثل مع الفنان” عادل امام”و الدكتور”يحيي الفخراني”.
ماهي الشخصيه التي ترغب في تجسيدها في الاعمال القادمه؟
لسه في شخصيات كتير عاوز اقدمها، انا قدمت أضعاف الشخصيات اللي قدمتها في التليفزيون علي المسرح و لسه في غيرهم كتير، الناس بأنماطها في مصر قماشه واسعه مليانه شخصيات.
ما الصعوبات و الانتقادات التي واجهتها في هذا المجال؟ و كيف تغلبت عليها؟
الصعوبات مازالت مش بتنتهي، المشكله لم تعمل دور مهم في مسلسل و متتعرضش، انا لحد دلوقتي عامل مسلسل بقاله سنتين متعرضش.
انا حاليا في مرحله انتشار، و مطلوب مني الانتشار و التواجد دايما اكتر من اختيار العمل.
و دايما بتغلب علي الصعوبات و الانتقادات دي بالشغل مليش علاقه بحد دايما بسعي و بحاول في مشواري.
ماهي الاعمال الفنيه الاقرب لقلبك؟
شغلي مع الأستاذ “محمد علي” كله بحبه، مسلسل”الهروب”مع الاستاذ “كريم عبدالعزيز”، و مسلسل” لم كنا صغيرين”، “عيون القلب” و مسلسل”خرم إبره”.
كيف كانت كواليس عمل مسلسل عيون القلب؟ و النجاح الكبير اللي حققه؟
“عيون القلب” ابني البكري، بحبه جدا بالرغم اني عملت مسلسلات كتير قبله، بس دا كان الانطلاقه الحقيقية ليا و دا اهم مسلسل في حياتي، لانه خلاني متواجد قدام الناس.
و الشخصيه نفعتني جدا في المسلسل.
و استاذ “لطفي لبيب” كان دايما معايا و بيساعدني و حقيقي كله كان حاضني و بيساعدوني.
و المسلسل محقق نجاح عظيم و لحد النهارده لم بيتعرض الناس بتتفرج عليه، و سر نجاحه كتابته، لانه مسلسل بيتي حقيقي و واقعي.
هل بتتفاعل مع ردود افعال الجمهور ؟
بتفاعل جدًا مع ردود أفعال الجمهور، و مش بس علي السوشيال ميديا، بتفاعل كمان علي ارص الواقع، و دايما بسال النقاد و استشيرهم.
هل هناك أعمال فنيه تقدمها في رمضان 2022؟
للأسف لا، و دا سببه اني كنت في موسم الرياض في السعودية و قعدت فتره كبيره بعمل مسرحيه”من تكون حبيبتي”قصه حياه “عبدالحليم حافظ”، و دا آثر لاني كنت بصور في السعوديه و المسلسلات بتتصور هنا في القاهرة، و من المفترض عندي مسلسل” تفتيش”و المفروض كان يتعرض من فتره و اتمني يتعرض قريب.
هل هناك أعمال فنيه تحضر لها الفتره القادمه؟
في أعمال ان شاءلله بعد رمضان، لسه بحضرله و هو جزء تاني من مسلسل في إطار التحضير، بس بطلب من الجمهور يدعيلي و يقف في ضهري و يدعموني.
