خليك حقيقي
ريم محمد
سنه بتخلص وسنه جديده حتبتدى وكل واحد فينا بيقيم السنه اللي فاتت في حياته وبيخطط لحياته في السنه الجديده.. وانت بتعمل دا تعالي اقولك علي حاجه كتير بيغفل عنها وممكن يكون فيها الخلاصه لكل حاجه بنمر بيها … في السنه الجديده ابدأها وانت مقتنع باننا بشر كلنا فينا عيوب وكلنا في حتة جوانا فيها نقص وكلنا عندنا احتياجات بنحاول نشبعها علي قد ما ظروفنا بتسمح محدش فينا كامل لان الكمال لله وحده … يعني من الاخر خليك حقيقي.. ايوه خليك علي طبيعتك الاصليه من غير القناع .. خليك شفاف اللي بيدور جواك شبهك من براك .. لما تحب حب بصدق ولما تفرح افرح بصدق ولما تحزن احزن بصدق ولما تكرم اكرم بصدق ولما تتواضع اتواضع بصدق ولما تمدح امدح بصدق وحتي لما تكره اكره بصدق … بلاش تعيش تمثيليه من ابداعك في الكتابه وتمثل الدور وانت جواك مش مقتنع بيه ومش عارف تعيشه .. خليك حقيقي وشيل القناع ومتخفش .. صدقك في مشاعرك حيجذب لك اللي بيقبلوك بكل مافيك حلوك ومرك مميزاتك وعيوبك .. ساعتها بس حتبقي حقيقي .. حتحب لانك بتعرف تحب وحتفرح لانك مبسوط وحتحزن لانك حزين وحتكرم لانك فعلا كريم وحتتواضع لان طبعك التواضع … حترفض تعيش ضد طبيعتك وتظهر عكس اللي جواك حترفض ان اي حد يفرض عليك دور مش بتاعك علشان يقبلك في حياته .. حترفض ان حد يغير هويتك وشخصيتك علشان يكون لك وجود عنده … حتعيش حقيقي وسط ناس بتحب حقيقتك مهما قل عددهم بس حيكونوا حقيقين … نصيحتي في السنه الجديده قبل اي مخططات .. ارفع القناع وخليك حقيقي… حتعيش موجود ……
كل سنه وانتم حقيقيين
