حدوته في يوم
كتبت /مرفت العربي
إيدك معايا ياقناوي
عشان نترب تحت الجاموسة
ونحش البرسيم بالمرة
قبل مانروح حنة العروسة
يومنا طويل ولسه
الأرض القبلية مش مدروسة
كلها ساعة والجرار يوصل
ولو مرحناش هتبقي شورتنا حوسه
البت سعدية هتقول لجدنا
ماانت عارفها ف الخبص سوسه
فاكر لما وقعت بين جيرانها
وعملت انها ملبوسة
الأيام بتجري ياقناوي
وانت لسه مشفتش عروسه
مشغول بالعزيق والأرض
وباليل ف شرب الجوزة
ياد هات حد يحلي دنيتك
ويونس ستك العجوزة
مش قولت لك من زمان
عروستك محجوزة
مال وجمال وأدب
وأهلها تلاقيهم وقت العوزة
عودها زي العزال ياولا
مش زي مسعدة كلبوظة
ولا امها عملالك عمل
ومعلقاه ف النروزة
ندرا عليا يوم فرحك
لا أفرق صندوقين كازوزة
يجازيك ياقناوي سهتني
و خليت النقلة مهزوزة
ونستني دريس الغلة
وآكل الجاموسة.
