قيمة الذات ما بين الغرور والثقة بالنفس
شيماء سليمان
دكتور من فضلك أنا عندي ثقة بنفسي بس في ناس بتتهمني إني مغرور ومتكبر !!!!
الغرور والثقة بالنفس وجهان لعملة واحدة وهى قيمة الذات….
أحياناً بنلاقي شخص عارف قيمته وعنده ثقة بنفسه وبيعتز بيها وناجح ومحقق أهدافه وطموحاته يقوم طالعله واحد من أصحاب النفوس المريضة اللي جواها مشاعر حقد وغيرة من أي حد ناجح ، هوب مطلع اسلحته الفتاكة ويشاور بأصبع الإتهام إنه مغرور ومتكبر ومتعالي .
تعالوا نعرف الفرق مابين إني أكون مغرور وأكون واثق من نفسي …..
الغرور :
صفة سيئة تلاقي صاحبها بيحب نفسه بزيادة وحاسس إنه متميز عن غيره طول الوقت علشان هو جميل ، مشهور ، غني ، من عيلة عريقة المسكين مش مدرك إن الإمتيازات دي كلها مش هواللي صانعها ؛ دي هبه من الله سبحانه وتعالي .دايما بيستعرض إمكانياته إللي هو متوهمها بطريقة مسرحية تلفت الأنظار بمناسبة أو من غير وده حتلاقيه في طريقة جلوسه ، مشيته ، كلامه ، انفعالاته وقراراته وكل ده علشان يرضي غروره ، شخصيته مذبذبة والغرور للأسف بيحولها إلي الشخصية النرجسية اللي مش بتكتفي باللاستعراض وفرد العضلات وبس لأ دي كمان بتحب تهدم وتحطم وتحقر من الغير وتفضل وراهم لحد لما تأذيه نفسياً وأحياناً مادياً وجسدياً لإعتقادهم إن كده حتبقى الساحة ليهم لوحدهم….ربنا يكفينا شرأذاهم .
الثقة بالنفس :
حسن تقدير للذات و للقدرات الخاصة وده بيكو ن نتيجة تجاوز المواقف الصعبة وحل الأزمات وتحقيق الإنجازات والإنتصارات واكتساب الخبرات ، الواثق من نفسه بتكون تنشئته سليمة من الطفولة وساعدته يتعرف على نقاط ضعفه ويقومها ويشتغل عليها وكمان إيه هى نقاط قوته وإزاي يستثمرها وينميها حتلاقيه شخص هادي ، متفائل ، شخصيته جذابة وقوية بيحدد أهدافه وينجح في تحقيقها ، طموح ، راضي عن نفسه ومتقبل سلبياته وايجابياته الجسدية والشخصية والإجتماعية وعارف يتعايش معاها وكمان بيفتخر بيها ومش مكسوف منها ، تلاقيه مش بيتكلم عن نفسه كتير إلا إذا اضطرته الظروف زي مقابلة عمل جديد أو من باب تحفيز وتشجيع شخص ما تحت عنوان إنت كمان تقدرتعمل ده وتنجح .
⚠️ في النهاية عايزين نستفيد من الكلام ده وخاصة رسالتي موجهة للآباء والأمهات خلي بالكم وانتوا بتربوا أولادكم بلاش تقعدوا تنفخوا فيهم بالكلام وتوهموهم بانهم سوبر هيرو ولديهم قوة خارقة تستطيع تحقيق أحلامكم وأحلامهم وأنتم على يقين إنهم ميمتلكوش القدرات اللي تؤهلهم لده ، ساعدوهم إنهم يكونوا أسوياء علشان ينفعوا نفسهم وميضروش غيرهم .
و لازم ندرك
” الغرور مش حيرفع من مكانتي
ولا التواضع حيقلل من شأني ”
دلوقتي يا دكتور أقدر أقول
” أنا إنسان متزن واثق من نفسي ، عارف قدراتي ومتصالح مع نفسي أنا مش مغرور”
