كفايه تعيشوا دور الضحيه
السيد عبد اللطيف حموده
اللي مش بيساعد نفسه مهما غيره يساعده مبيتحركش واللي مصمم يشوف الدنيا سوده هتفضل تغمق لحد ماتبقي كده واللي بيسيب الدنيا تحركه عمره ماهيوصل لهدفه غير لما يعاند ويحارب عشانه،الدنيا مش بتدي لحد اللي هو عايزه ع طبق من دهب لازم تتعب وتتسحل ويطلع عينك مره واتنين وعشره وتقع وتقوم ف كل مره عشان لو استسلمت هيضيع منك هدفك وهتضيع من نفسك والدنيا هتدوس ع وشك ووقتها هتستسلم وتقعد تعيط وتقول اصل الناس واصل الدنيا وتعيش دور الحزين والطير المجروح كلنا بلا استثناء عندنا جروح وهزايم بس في فرق بين حد بيلم جرحه ويداويه وحد سايبه بينزف وقاعد يعيط!
الفرص مبتجيش كتير او مبتجيش اصلا لو مشيت هتوصل لو سرعت شويه هتوصل لو جريت هتوصل اسرع لو وقفت مكانك هتدفن مطرحك وحلمك مش هيستناك وغيرك هيوصله واللي وصل مكنش قاعد مكانه بيحلم اللي وصل كان مسحول عشان يحققه.
لو بتفضلوا تشغبطوا في حياتكم وتلونوها اسود الناس اللي حواليكم مش هيفضلوا طول العمر يلونوا ويرسموا ورد وقلوب ويمسحوا القرف اللي بتعملوه ع الاقل ساعدوا نفسكم وادوا فرصه للناس اللي عايزينكم احسن يساعدوكم لان العيب مش طول الوقت في الدنيا والناس اوقات كتير العيب بيكون منكم.
كفايه تعيشوا دور الضحيه..
