بثينة رشوان: المجاملات الفنية أصبحت علي حساب الفن والفنانين الموهوبين
محمد طه
:ميار إبراهيم
بثينة رشوان بنت الفنان مصطفي رشوان أستاذة السينما المصرية التي قدمت مسيرة فنية حافلة ما بين الدراما التليفزيونية والسينما والمسرح فمن الأعمال التلفزيونية هوانم جاردن سيتي وعظمة يا ست ومن الأعمال المسرحية بهلول في إسطنبول وزقاق المدق لقبت الفنانة الجميلة بثينة رشوان بملكة الدراما التليفزيونية تم إكتشافها من قبل الأستاذ رضوان الكاشف بدأت عالم الفن والتمثيل من خلال الإعلانات ثم قامت بالمشاركة في عدة أعمال فنية
وجاء نص الحوار كالتالي:
كيف تم ترشيح حضرتك في دور مسرحية زقاق المدق؟
جيت مكان الفنانة نهال عنبر لأن المسرحية تم عرضها في الإسكندرية في الموسم الأول للعرض بعد كدة كلمني مخرج العمل المسرحي دكتور عادل عبده هو اخ وزميل وسبب موافقتي علي العمل هو دكتور عادل عبده لانه مخرج كبير بيحب شغله وبيكون شغل ممتاز جدا فلما كلمني وافقت
رد فعل الجمهور من دور حضرتك بكونك أم حميدة؟
دوري تغير شوية عشان يبقي مظبوط ومعقول للجمهور وهو من كوني أم حميدة إلي صديقة حميدة عشان عامل السن قريب بينا جدا كمان عملت روح حلوة للدور اللي هي الدلوعة بنت البلد الجدعة
ماهي إستعدادت حضرتك لتقمص الشخصية بشكل كويس؟
أخدت خمس أيام فقط عشان أذاكر الشخصية بس انا بحب المسرح بحسه أنه بيتي لأن لما بقف علي خشبة المسرح بحس إن في عالم تاني خالص
أول أعمال حضرتك الفنية في المسرح؟
القطاع العام للمسرح كانت مسرحية أهل الهوي ومسرحية يا إحنا يا هما وكمان الرقص علي القمر أما عن القطاع الخاص كان بهلول في إسطنبول
هل هناك فرق في تقديم الأعمال الفنية علي خشبة المسرح أو السينما أو الدراما التليفزيونية؟
طبعا في فرق كبير علي خشبة المسرح منك للجمهور النجاح وقتي ورد فعل الجمهور بيكون في الحال فكل حاجة بتخلتف السينما ليها شكل الدراما التليفزيونية ليها شكل المسرح لي شكل خاص به لأن منك للجمهور ادائك أعلي إحساسك أفضل مفيش بقي توقف أو تسجيل أو تقطيع الممثل بيكون عنده حضور ذهني قوي ومركز لأن في ممثل ميعرفش يستلم منك كيو بمعني لازم يستلم قافلة الجملة عشان لو جملة تغيرت يحصل دروب دنيا تقع بعد كدة
سر إختفاء حضرتك او قلة الأعمال الفنية لحضرتك سيبها أية؟
دة لسبب إن المجال أختلف يعني تحسي انك انتي بقيتي غريبة شوية كمان سوق العمل أصبح متاح لكل الناس سواء كان بيفهم وعنده الموهبة الفنية أو لا وكمان شويه تأثير من السوشيال ميديا كمان تفكير المخرجين الشباب بقي مختلف عنا ومفيش تجانس بينا وبين الشباب اللي علي الساحه الفنية بشكل كبير كمان المجاملات الفنية بقيت علي حساب الفن والفنانين الموهوبين عكس الفن زمان تقدر تعمل الدور بشكل كويس ومناسب هتعمله غير كدة لأ
الإشاعات جزء من الفنان هل إشاعة كونك بنت الفنان رشوان توفيق كانت بتضايقك وليست بنت الفنان مصطفي رشوان الملقب بأمير السينما المصرية؟
طبعا مكنتش بتضايقني لأن الفنان رشوان توفيق أبونا كلنا لأنه تعلمت منه زي ما تعلمت من والدي الله يرحمه ممكن يضايقني لو أثر عليا بحاجه سلبية
عمل فني كان ناقله في حياتك وكان محطه مهمه؟
لا والله كل أعمالي كويسة ومبسوطة منها من هوانم جاردن سيتي وعظمة يا ست اولاد السيدة السيرة الهلالية آدم و جميلة والإمام الغزالي حمزة وبناته الخمسة
فنانة مصرية حضرتك تقدم لها الحب والاحترام؟
بحب جدا الفنانة نببلة عبيد بحب آدائها وروحها وإحساسها ممثلة جميلة أوي
هل في شخصية فنية قدمتها وكانت قريبة من حضرتك علي أرض الواقع؟
قريبة مني بشكل كبير لأ مفيش لكن من تفاصيل الحياة اللي بنعيشها ممكن أحس بعض حاجات فقط قريبة مني ومن شخصيتي لكن حاجه قريبة من شخصيتي الحقيقه لأ
فنان من زمن الفن الجميل كان نفسك تمثلي معاه؟
طبعا الفنان الكبير رشدي أباظة شخصية فنية جميلة
تفاصيل إسم حضرتك وتغييره من بوسي إلي بثينة؟
اسمي بوسي لما دخلت عالم الفن والتمثيل قالولي غيريه عشان ميبقاش مشابه أو يحصل لخطبة مع إسم الفنانه بوسي فقولنا نغيره لإسم نورهان لكن حسيت بعيد أوي عن بوسي فخليته بثينه رشوان
هل في أعمال فنية قادمة ان شاء الله؟
ان شاء الله في أعمال فنية قادمة بس مش هقدر أعلن عنها دلوقتي هتبقي مفاجأة
