“أبويا مامتش”

كتبت/ميرفت العربى

يا باب بيتنا
يا لمتنا
يا عمرى اللى ف لحظة فات
يا فرحتنا
و يا ضحكتنا
يا طبلية وسبع أخوات
يا خشبة ستر سانده الباب
مداس كان حارس الأبواب.
يا خِضر وتارك العلامات
يا شراعة محبة ونور
يا تنسيمة قزاز مكسور
أبويا مات
أنا المولود
بنعمة أن أنا شبهك ولون صوتك
وأنا المعدود
على السبحة بدعوة ستر
وأنا المسنود
بسيرتك حتى فى موتك
يا رب الصبر
أنا المتوصىِ من طيفك
أزورك وأبعت الحسنات
وبعد المعركة سيفك
فى دار الحق بالدعوات
أنا علمك وصوت البر والصدقات
مين اللى قال أبويا مات!?
أبويا مامتش
لسه ضحكته ف البيت
ولسه التوب متعلق على الحيطة
طحين أبيض وبركة ف زيت
ولسه الحب متشعلق
ف ريحة البيت
بقايا تراب رحلته حنا كعوب الدار
حكاوى أبوزيد وأبن عروس والأشعار
ولسه عبايته ف المسمار
ولسه حكمته وعدله
وعلمه وحفظه للحواديت
أبويا مامتش
لسه محبته للحق ف عنينا
شهادة تنصر المظلوم
ولسه البركة مدفونة
ف حضير الدار لمون أخضر
ولسه الخطوة منقوشة
ف حصير البيت ولسه كرمه بيمطر
ولسه عروق السقف مزيونة
بدخانة وقيد أمشير
ولسه الجو متعطر
ولسه بيجى ويشقر
ولسه عصايته بتشاور على السكة
وبركة زمزم اللى جابها من مكة
ونور عرفات
وسبحة كهرمان أبيض
جبل كرامات
مين اللى قال أبويا مات!؟
دفأ إيده ف أول يوم فى مدرستى
ومحفظته اللى سابها ملانه حنيه
وتقوى نافعة ذرية
وسيبيه بتوزن الكلمات
مين اللى قال أبويا مات؟!
ولسه روحه بتجينى
تصحينى ف سحور رمضان
أبويا عارفنى نومى تقيل
ولسه مسحراتي بلدنا
بينادي على اسمه بنفس اللحن والمقامات
فى جوف الليل
ح يجيى كل ليلة عيد
يوزع بره حلويات
ح يجيى كل عيد أضحى
ويدى الكل عيديات
مين اللى قال ابويا مات?!
أبويا مامتش
روحه عايشه حوالينا
أبويا رحل
لأن مفيش بشر بيدوم
أبويا عاش بحس ولاده ف الدنيا
أبويا مامتش
مين قال اللى خلف مات