ماجده حسين عبدالفتاح:تكتب:الزوجه الثانيه
انا كنت من الناس اللي اشوف الزوجه التانيه كدا اتغاظ منها كأنها ضرتي انا لاني كان بيصعب عليا ظلم الزوجه الاولي المهم كنت مره قاعده في عياده نساء في مستشفى وكانت زحمه وطبعا احنا كستات كده هنقعد نعمل ايه غير اننا نرغي مع بعض المهم اللي قعدت جمبي واحده متزوجه واتكلمنا وفي وسط قالت اصل انا زوجه تانيه
المهم انا بقي اول حاجه قولتها ليها انتي جميله اوي هي فعلا كانت حلوه ايه اللي يخليكي تتجوزي راجل متجوز بصراحه انا مش بحب الست اللي تاخد واحد متجوز متزعليش مني انا صريحه ماكنتي اتجوزتي ارمل او مطلق وانتي فرص الجواز بالنسبه ليكي حلوه اه هي كانت مطلقه ومعاها ولد
لقتها بتقولي انتي متعرفيش ظروفي بس احنا قاعدين بنتكلم مع بعض بقالنا شويه وارتحت ليكي
بصي انا اتجوزت صغيره وجوزي من عيله غنيه المهم جوزي كان وارث ومع الاسف صرف فلوسه علي المخدرات وطبعا العيشه معاه كانت صعبه فتم الطلاق ومش عارفه اخد منه حتي مصاريف ابني لانه من المخدرات بقي في عالم تاني
وعم ابني بخيل جدا مش بيرضي يدي ابني حاجه
وانا ظروف اهلي صعبه
واحد شافني اتقدم ليه شكله حلو مؤهل عالي مقتدر وقالي انه هيتحمل مصاريف ابني
طب واحده ظروف اهلها وحشه ونصيبها جه في زوج وراها ايام صعبه مؤلمه واتطلقت ومش معايا اصرف علي ابني واهله لو ادوني حاجه بتبقي بسيطه مش هتكفينا في المعيشه وبتبقي طالعه منهم زي صدقه ببقي مكسوفه اني بأخدها لانهم مش اخوات جوزي لا دول ولاد عمه وبيدوني الفلوس دي كا مساعده وقالت ليه علي الرقم فعلا ميعملش حاجه في الزمن ده
لما يتقدم ليا واحد بالمواصفات دي مش يبقي فرصه بالنسبه ليا مش يمكن ربنا بعته ليه عوض عن اللي شوفته
قولت ليها فرصه بس علي حساب زوجته وا اولاد
قالت انا رفضته اول مره مع ان اهلي وافقوا عليه خوفت لا ادخل في مشاكل مع مراته الاولي
لكن هو فضل سنه كل شويه يجي يتقدم وقالي انه مش مرتاح واني مش بظلمها انا مكمل معاها علشان ولادي لكن هي مش مريحاني وبتاعت مشاكل وحياتي معاها نكد ديما هي بتشتغل وبتحب شغلها وواخد معظم وقتها وانا مش في تفكرها كازوج
وطبعا لما لقيت انه مصر علي الزواج مني وانه بيحبني ومتمسك بيا وسنه مش كبير لا شاب وجميل كمان طب انا اضيع مني فرصه ليه ربنا بعتها ليه وايه هيضمن ليا ان يجيلي واحد بكل الصفات دي
واحد هايخدني من النار للجنه كفايه انه قالي هتكفل باابنك وهيبقي زي اولادي وانا لسه صغيره وحلوه ومن حقي اعيش
قولت ليها طيب انتي بعد ما اتجوزتي مبسوطه وهو عادل بينكم
قالت هو كويس بس مراته لما عرفت رفعت عليه قواضي كتير وعملت مشاكل كتير ومصممه علي طلاقي
تخيلي بعد ما قولت انه عوض ليه قاعده خايفه ومرعوبه من كتر الضغط عليه يسبني بعد ما خلاني احبه واحس معاه بالامان عارفه انا جايه اكشف عوزه احمل علشان يبقي في طفل يربط بينا علشان محدش يقوله طلقها قبل ماتخلف منك وبرح نفسك من المشاكل
هو بيحبني بس زوجته عملت قضايا كتير وخلتيه يصرف جامد وبقي بشتغل شغلنتين علشان الدنيا تمشي وعرض عليها ايام اكتر من ايامي وبرضو هي رافضه يعني انا اللي مظلومه في وقتي معاه وراضيه علشان اعيش انا وابني ومحتجتش لحد انامش عوزه حاجه غير الستر
بصراحه انا من وقتها قولت مش هلوم علي حد طالما معرفش ظروفه ونزلت بعدها بوست علي جروب كبير للستات عن الزوجه الثانيه ظروفها ايه
ولقيت ستات كتير زوجه تانيه وقالت عن مشاكلها وان في منهم كتير الظروف اللي حكمت عليهم بالوضع اهمها الفقر والاحتياج
طب واحده تقولي طب انتي متعاطفه معاها تقبلي ان جوزك يتجوز عليكي
هقول ليها لاء طبعا مقدرش وصعب جدا اتحمل انا مش ملاك ودي طبيعه في كل ست بتغير علي جوزها
بس في الاول والاخر دي اقدار ونصيب مش بأيدينا يعني الست اللي جوزها اتجوز عليها ده مش عيب فيها دا ابتلاء من ربنا ليها والست اللي جوزها لسه قاعد معاها مش شطاره منها الله اعلم ههههههههه مايمكن لو ظروفه تسمح كان اتجوز او احنا كرهناهم في الزواج ههههههههه
