د.شيماء سليمان تكتب .. الإدمان السلوكي تعريفه وأنواعه وكيفية الوقاية لعدم الوقوع فيه
يعني إيه يا دكتور هو فيه إدمان تاني غير إدمان المخدرات
آه طبعاً في إدمان السلوكي هو نوع من أنواع الإدمان سريع الإنتشار ولكنه مش ظاهر عشان كده بيسموه الإدمان الخفي.
وأشكاله متعددة :
إدمان الاكل ، التسوق ، فعل المخاطر ، وسائل التواصل الإجتماعي ، الألعاب الإلكترونية ، الجراحات التجميلية ، العادة السرية ،وغيرهم كتييير.
يعني نقدر تقول إن أي نشاط طبيعي بنعمله ممكن يتحول إلى إدمان لو ممارستنا ليه تخطت الحدود المعقولة.
علشان كده بنقول “خير الأمور الوسط
وإزاي بيحصل ؟؟
بيحصل لما نبالغ في فعل سلوك معين ويبتدي السلوك ده يسيطر علينا وعلى تفكيرنا ويبقى عندنا هوس تجاه السلوك ده.
أنا فهمت بس إيه علاقة السلوك بالإدمان ؟
بص يا سيدي لما الواحد بيتعاطى مخدر الدماغ بتفرز كميات أكتر من الطبيعي من هرمون الدوبامين اللي مسئول عن شعورنا بالسعادة فيرتبط الشعور المفرط بالسعادة ده بتعاطي المخدر وده اللي بيحصل بالظبط في عملية إدمان السلوك لأن في نظام داخل أجسامنا كلنا وهو” نظام المكافأة “وده عبارة عن عدة نقاط موجودة داخل دماغنا بتتعاون مع بعض لإفرازهرمون الدوبامين فيتولد عمدنا شعور مكافأة لطيف يحفزنا تجاه أفعال معينة زي تعاطي مخدر أو فعل سلوك معين من اللي قولنا عليهم من شوية ، فيبتدي عقلنا يقولنا الفعل ده ممتع
ويلا نعمله تاني ،وعشان إحنا شاطرين وبنسمع الكلام بنعمله تاني وتالت وعاشر ماحنا انبسطنا
فنقع في بؤرة الإدمان والسلوك المرضي
وعلى كده ليه أضرار زي إدمان المخدرات ؟؟؟
أكيد ليه آثار سلبية على صحتنا النفسية والإجتماعية والجسدية وكمان على حالتنا الإقتصادية.
آخر سؤال يا دكتورتنا تنصحينا بإيه عشان مندخلش في دايرة الإدمان السلوكي ؟؟؟
ولا يهمك السؤال جميل ومهم
اًولاً وثانياً وللمرة المليون ” خير الأمور الوسط ” الوسطية خليها منهجك في الحياة ، أدينا ببنعيد ونزيد يارب نحفظها.
انتبه لوقتك واتحكم فيه يعني كل يوم حدد ليك خطة لأعمالك اليومية زي شغلك ورياضتك والوجبات بتاعتك وكمان وقت الترفيه بتاعك مش حرماك من حاجة خالص بس في آخر اليوم قيم انجازك للأعمال دي بالسلب أو الإيجاب .
لو عندك وقت فراغ اجري واشغله بحاجة مفيدة رياضة مثلا بتحبها ، هواية ليك وأهملتها ، دور بس وانت حتلاقي مليون حاجة مفيدة تعملها بس إنت اللي بتستسهل ومكسل.
قوي علاقاتك الإجتماعية عشان دول اللي حتلاقيهم داعم ليك وقت أما تحس إنك ضعيف .
وفي نهاية كلامي حابة أقولك إنت أقوى من أي مخدر أو سلوك يستحوذ عليك ويتحكم فيك …
إنت أقوى
