مشكلة عضوه

ماجده حسين

لكلا منا حياتة بداخلها لحظات فرح ولحظات حزن وفيها نتاج ما مررنا بية لسنوات

نعيش الحياة بكل فصولها وبكل تقلباتها وفينا من يتحكم فى مشكلة ويستطيع حلها ومنها من لا يستطيع أن يصل إلى الحل أو بداية الطريق لحل المشكلة ومن هنا تقدم جريدة وموقع نبض الوطن هذا الباب لكل قرائها نعرض المشكلة بكل شفافية ومصداقية ونحاول أن نصل إلى حل لصاحب المشكلة سواء من رأى الجمهور المتابعين أو حل من فقهاء أزهرين أو محامين أو دكاترة على حسب كل مشكلة تحتاج رأى طبيب أو محامى أو فقية دينى

بداية المشكلة 

انا دكتوره ومن عيله كبيره جوزي اول الجواز لما كنت بختلف معاه كان فعلا بيضربني وضرب صعب مره فيهم ربط ايدي بالحزام ونيمني علي الارض ونزل فيا تلطيش لمجرد اني عارضته في عزومه كان عايز يعملها لأهله وفاجئني بيها وانا عندي توأم بيرضعوا بيسهروني وكان البيت يضرب يقلب والله ما كان اعتراض علي اهله بس انا كنت هموت من الاحراج انهم يجوا يلاقوا المنظر كده وكنت بلوم عليه انه بلغني متأخر وقعدت اتحايل عليه يعتذر وهو مصمم

فانا قلت له مش هيحصل وانا مش هستقبل حد والبيت عامل كده في لحظه مشفتش قصادي وسحلني زي ما حكيت

 

وبعت لي رساله ان اهله جايين وعشان منظرنا قصاد الناس لميت الموضوع وقمت روقت البيت وطبخت واستقبلت الناس بمنتهي الكرم استنيت ان ده يخليه يجي يعتذر او يتراجع خاااالص بالعكس كان شايف اني السبب اني رديت عليه واني لازم اتعلم اهاود بعد كده وباسني وحضني وطلب مني علاقه والدنيا عدت

 

من بعدها الموقف ده متكررش مش عشان هو بقي ملاك واتعلم لا

عشان انا اللي اتعلمت وعرفت ان عشان الجوازه دي تمشي لازم استقل عنه ومدخلش معاه في اي حاجه هتسبب خلاف

اشتغلت عشان اجيب خدامه من فلوسي عشان تشيل عني طلباته الكتير اللي مقلوش لا عليها وعشان ادخل ولادي المدارس الانترنشونال اللي بالرغم من امكانياته وانه ممكن يدفع الفلوس دي في عزايم بس ميدفعهاش للتعليم فبقيت اقوله هدفع انا فيوافق وعشان اشترى لبس نضيف زي ما انا متعوده

انا اتهزمت واتكسرت ورضخت سنين وحياتي كلها بقت عباره عن محاولات اني مشاركوش اي حاجه في حياتي لانه يا اما كان بيتخانق يا اما بيرفض رفض قاطع ولو صممت بضرب عدي عشر سنين حياه كامله بعيد عنه نفسيا ووقتيا لحد ما من سنتين طلبت الطلاق والله ما دمعت ولا اتضايقت لحظه لان حتي علاقتنا الخاصه اتروضت فيها اني اعمل اللي هو عاوزه بخضوع فحتي دي اتقفلت منها وانا في عز شبابي واحتياجي للعفه بس فعلا بطني كانت بتتقلب جات عليا لحظه مبقتش قادره اقدم اي تنازلات ولا اعيش وامشي المركب

الوقعه بتاعت العروسه اللي في اسماعيليه والناس اللي بتقول عليها مهزقه وجعتني اوي واتوجعت علي نفسي هو انا ليه فعلا كنت مهزقه كده بالرغم من اني قادره استقل عنه تماما اهو ليه رضيت بالجوازه دي ليه بجد ضيعت عمرى وعمر ولادي مع ام مهزومه وبتعمل دور الاب والام عشان تتجنب الخلاف والضرب

لقيت الاجابه لا انا مش مهزقه انا تجنبت التهزيق الاوحش بتاع الربط بالحزام والتلطيش والشتيمه بالتهزيق الاقل اللي هو اني اشيل نفسي وولادي ومدخلش معاه في صراع الناس اللي بتلوم الست دول يقولولي حلولهم ايه ؟

ايوه منكملش مع حد بيضربنا فاحنا اللي نطلق ونشيل ليله الجواز لوحدنا فين الحل برضوا

 

ما كلها خسرانه

بطلوا تنظير وواجهو نفسكم ان مفيش حل من عند الست وعمر ما الضحيه يتلام انه مش بيحل

الحل ان يبقي في قانون راااادع ضد العنف اللي الست بتتعرضله والردع دفع غرامات محترمه تخليهم يبطبوا اللي بيعملوه لكن تقولولي احنا الغلطانين عشان بنوافق ومهزقين حرام بجد

انا دلوقتي سني ٣٤ سنه

مطلقه

بصرف علي طفلين من الابره للصاروخ

وحيده وعندي حرمان عاطفي وجنسي وتقبل اجتماعي