أخر الأخبار

د. خالد حامد يكتب … كل واحد يخلى باله من كولستيرولة

ناس كتير بتركب دعامات بالشرايين التاجية وتكون احسن نوع ومع أفضل دكاترة وبعدين يحصل عنده سدد بالدعامات او الشرايين مرة تانية !

 

ازاي احافظ علي الدعامات والشرايين بعد القسطرة العلاجية؟!!

العوامل اللي بتسبب تكرار ضيق الشرايين كتير أهمها التدخين والسكر والضغط وارتفاع الكولسترول بالدم

طيب انا مش بدخن ولا عندي ضغط ولا سكر وحصلي جلطة بالقلب وركبت دعامات، حصلي من ايه يادكتور؟؟

post

هنا يجي دور ارتفاع الكولسترول بالدم والعامل الوراثي في الأسرة ،

يعني لو حصل جلطة بالقلب لحد في الأسرة او ضيق شديد بالشرايين بدون سبب ابحث عن الكووولستروووول بداخلك وعالجه علشان تمنع الإصابة بأمراض القلب مستقبلاً

مشكلة الكولسترول انه حاجة مش متشافه ومالوش أعراض تحذيرية بتعرفه فقط بتحليل الدهون الكاملة LIPID PROFILE أو حدوث مضاعفاته

(أحدث طرق علاج الكولسترول بالدم)

أخر الأبحاث العلمية بتقول ان الكولسترول الضار بالجسم LDL لازم يكون

اقل من 116 للشخص الطبيعي ودة ممكن توصله بنظام غذائي والرياضة

واقل من 100 لمريض سكر حديثا

واقل من 70 لمريض سكر اكتر من 10 سنين، او تاريخ مرضي بالاسرة لأمراض القلب او أرتفاع شديد بضغط الدم والرقم دة مش هتوصله غير بالعلاج

واقل من 55 لمرضى القلب والشرايين التاجية واللي مركبين دعامات او مرضي السكر اكتر من 20 سنة

= طيب بس المريض ماشي علي العلاج بتاع الكولسترول (زي الاتور او لبيتور او كريستور او زيروفاسيت أو كوليروز بلس ) وباكبر جرعة له كمان 😬 ورغم كدة الرقم عالي

من 5 سنين تم التوصل لعلاج يعتبر سحري لخفض الكولسترول الضار LDL عن طريق حقنة تحت الجلد غالية شوية بتتاخد كل اسبوعين (للحالات اللي مش مستجيبه للعلاج بالأقراص السابقة) ومتوقع بعد شهرين من العلاج تقل جدا درجة الكولسترول الضار بالدم للمعدل المطلوب ، للأسف زي اي علاج في الاول بيكون غالي جدا (قيمة العلاج الشهر 7800 جنية) لكن يوما ما هيقل تمنها زي ما كل حاجة بترخص من حولينا  وهيكون في شركات منافسة بسعر اقل ان شاء الله يعني

موجودة الحقنة دي في مصر بأسم (برالوينت 75 ملي جرام) او (ريباثا 140 ملي جرام) ولا توصف إلا باستشارة طبيب قلب متخصص وبعد المحاولة بالعلاج الدوائي اولا.

مش بس كدة فى المستقبل القريب سيصبح علاج الكولسترول وقصور الشرايين التاجية للقلب حاجة كدة وقائية زي المصل للمرضى المعرضين لحدوث جلطة بالقلب قبل حدوثها بحقنة تصل بالكولسترول الضار لأقل معدلاته وهي دي الطفرة العلمية الحديثة اللي تمت بالفعل والعالم كله بيتكلم عنها  حقنة بتتاخد كل 6 شهور وهتبقي موجودة في مصر قريبا بأسم ” لكفيو ” سعر الحقنة الواحدة 39 الف جنية بس  ومش انا اللي مخترعها ولا ببعها علشان ماحدش يقولي حسبي الله ونعمة الوكيل في الدكاترة ولكن الحقيقة قد تكون هي العلاج المنقذ لبعض الحالات الصعبة المتكرر فيها تضيقات الشرايين التاجية.

طيب انا بقولك الكلام دة ليه وانت لا هتعرف تشتريها ولا تفكر تاخدها اصلا؟؟؟ علشان تعرف ان صحتك دي غالية جدا جدا وبيدفع في كل تفصيلة منها ملايين الملايين

وبعد ذلك كله تقوم ضارب طبق البسبوسة غير عابئ بكل تلك الأبحاث العلمية ثم تنظر الي المرآة وقد ترهلت بظابيظك وتقول اية دة هو انا تخنت أوي كده لية

 

زر الذهاب إلى الأعلى