اسرار جديده تكشفها نبض الوطن حول واقعه طلاق ام فى زفاف ابنتها
مرفت العربى
فيه ڤيديو منتشر لأب في فرح بنته مسك المايك وقال : “ألف مبروك للعريس والعروسة، أما بالنسبة لأم العروسة فَهي طالق بالتلاتة وتروّح من القاعة على بيت أهلها”
المصيبة إن أم العروسة أكدت بأنها منفصلة رسمى بوثيقة طلاق من ٢٤ يوليو ٢٠٢٠ !!
يعنى مطلقها بقاله أكتر من سنتين وراح اتجوز وساب ولاده والخلافات بينهم كانت من سنين قبل الطلاق وكانت هي المسئولة عن ولادها في كل حاجه واللي عمله دة مجرد تصرف يكيد بيه طليقته في فرح بنتهم اللي رايح وناوي يضيع عليها فرحتها ويقل من كرامتها قدام العريس وأهله وكل الحضور !!
متخيلين القسوة ممكن توصّل الإنسان لفين؟ مع الاعتذار عن لفظ إنسان لأن ده تصرف صادر عن شخص فاقد لكل معاني الإنسانية والرحمة والأبوة !
زي ما فيه عقوق والدين فيه كمان عقوق أبناء
سيدنا عمر بن الخطاب قال لأب راح يشتكيله عقوق ابنه “جئت إليَّ تشكو عقوق ابنك وقد عققته قبل أن يعقك، واسأت إليه قبل أن يسيء اليك؟!”
اتقوا الله في ولادكم ومشاعرهم ونفسيتهم، لأن هتتحاسبوا قدام ربنا على كل ده، ماتخلفوش طول ما انتوا مش قادرين تحبوهم وتتحملوا مسئوليتهم وتخافوا تجرحوهم وتكونوا مصدر أمان ليهم
ابنك مش مختارك، أرجوك خليك حظه الحلو في الدنيا، عشان ياخد بإيدك للجنة في الآخرة.
