.. سعاده معالي الموبيل ..صاحب المقام الرفيع و العالي ..

مصطفي العموري

موبيلي ضاع مني .. !!
وبعد يومين تلاته رجعلي ..
لكن لما غاب عني وقفت كل مصالحي ..
لا عارف اوصل لحد ولا حد عارف يوصلي ..
حتي اصحابي واهلي وكل حبايبي
ف حسيت ب اهميته وقيمته وكان اللي غاب حته مني ..
م انا اتعودت عليه وبصراحه بقي ب ايده امري ..
اعتمدت عليه تماما وده كان جرمي وكل ذنبي ..
وثقت فيه و حطيت عليه اسراري وبقي كل حياتي
وحتي امور خاصه ب عيلتي و شغلي ورزقي ..

واتخيلت انه لما يرجع هيشرط عليه .. ايوه الموبيل هيشرط من حقه وفيها ايه يعني .. ف نشوف ايه طلباته لما رجعلي وقال ايه عني ….. !!!

الموبيل اول م رجع بيقولي ..
…. انا عايز شاحن اصلي .. زي كل زمايلي
ولا انا اتكتب عليه الصيني ومال بختي
أشمعني انا يعني …. !!!

….. وعايز ف كل مناسبه جراب جديد ودلايه تتعلق ف جنبي من حقي البس و اغير وادلع نفسي م انت كنت حارمني وكمان كنت ظالمني ..

……. وعايز درج او رف لوحدي مش دايما ع الكوميدينو سايبني وسط حاجات مش من قيمتي مفاتيح وسجاير ومحفظه وحاجات كتير بيبقو خانقيني واحيانا بيبقي نفسي افك عن نفسي او ببقي مظبوط ع الفيبراشن وعايز اهز براحتي ..

…….. وكمان انت تاعبني البرامج كتير ف يا تخف البرامج يا تجيب حد يساعدني ويشيل عني هات موبيل صغير يعني انا كل زمايلي لسه زيرو وانا معاك اللي شيلت الهم بدري ..

…….. وعايز فتره راحه افصل فيها شحن وتحل فيها عني وتحذف اللي مش مهم وخف عني الحمل انا تعبان وياك ولو دورت الدنيا مش هتلاقي موبيل زيي ولا حتي ضفري وع فكره الموبيلات كلها مرتاحه الا انا مع ان مفيهمش حد احسن مني

…….. ولما جبتني جديد كنت بالعز واعدني .. وشحنت كرت ب 100 وقولتلي مش هسيبك من غير رصيد تملي .. ومنفذتش وعدك وباقتك مش بتكفي وللسلف من الشركه حاوجني وم الديون بقيت بتحرجني وده مش وضعي ولا دي قيمتي ..

……… وتحط كلمه سر مش دايما كده سايبني حتي عيالك لو انت نايم مش عاتقيني من العاب ل اغاني ل تطبيقات ل اتصالات يا عم ارحمني ..

…….. رديت انا عليه ..
وغضبت و عليت صوتي عليه
وقولت بتقول ايه يا بيه ؟؟
و بتشرط ع ايه ؟؟
غبت عني وراجع شايف نفسك ليه ؟؟
طب ع ايه .. ده انا كنت مرتاح م الاتصالات والطلبات وعشت يومين من احلي ايام عمري من غير حوارات ولا دوشه ولا كتر كلام يا روح قلبي وكفايه انك بس راجعلي فاصل شحن كمان ومن غيري ملكش كيان ولعلمك لا فكرت فيك ولا كنت ف الحسبان ..
يا بيه قولي شايف نفسك بس ليه و ع ايه .. !!!

…… هو مردش تاني غير بكلمتين وبيهم هزمني و خلاني اطاطي وانفذ كل طلباته واقوله كمان كلامك ع راسي و اوامرك تؤمر يا غالي ..
…. وطي صوته و وشوشني ف وداني .. قالي اسمعني علشان مش هقول تاني وشغل مخك وافهمني ..
تحسو انه بيهددني ..

…. جوايا وعندي ومعايه كل حالك ومصالحك و اسرارك ومن غيري ومن غير كتماني ولا لو طولت لساني وطلعت بس بياناتي وحتي لو ظلم وافترا الكل هيسمعني وهيصدق والله حكايتي الناس بتحب الباطل والمغري ف انت هتخسر كتير وابقي قابلني .. ..
وان رفضت هغيب عنك تاني وهبقي ع الغدر ناوي فاهمني ومهما دورت مش هتلقاتي ..

… يا اخوانا انا محتار هو مين فينا اللي مسيطر .. مين فينا اللي بيفكر .. هو اتمسكن لحد م ف حياتي اتمكن هو ازاي خلاني عنده أجير وعنده اسير وهو الريس وصاحب القرار والمصير هو المتحكم و هو القاضي والمدير .. بصراحه ده كتير ..

… .. طب ازاي يا بني ادمين م احنا كنا عايشين من غيره زمان وكانت كل امورنا تمام والحال كان ماشي وشغال وعال العال دلوقت بيدي جبته انا وملكته امري هيبقي ايه الحال لو نفذ تهديده وخاني واسراري وشغلي حد يفهمني وحد يقولي والكل ياريت يجاوبني …

… .. هتعمل ايه لو كنت مكاني هتقبل اوامره وطلباته .. ولا هتقف قدامه وتقوله كفايه هحرص منك هعيش وحدي واعتمادي ع مخي ونفسي وهخلي بالي ع حالي ولو هتعذب واطلع من جلدي هتحمل ولا انك تتحكم فيه وتملك يوم امري .. !!! ؟؟؟

… ده اللي وصلناله و ده اللي بجد حصلي ..
وهي دي يا اخوانا حكايتي ..
بيلوي دراعي لاني عنه مش قادر استغني ..

.. والادهي والامر لو خاني او بقي خصمي..
مين هيقف معايا وجنبي ..
ومين هيصدقه ويبقي معاه وهيكون ضدي ؟؟